DILI, 17 novembru 2023 (TATOLI) – Universidade Nasionál Timor Lorosa’e (UNTL) loke ona kursu mestradu iha área hitu ba estudante sira husi universidade oioin. Molok atu kontinua kursu, universidade sei disponibiliza formasaun dalen portugés ba kandidatu sira.
Vise-Reitór ne’ebé trata Asuntu Pós-Gradasaun, Afonso de Almeida, hateten planu ida ne’e UNTL halo tanba hakarak produs ema ho kualidade, tanba ne’e kandidatu estudante foun sira ne’ebe hakarak kontinua kursu mestardu ne’e pelu menus entre fulan haat no neen tenke partisipa uluk kursu lian portugés.
“Hakarak ka lakohi ezijénsia iha kursu mestradu ba segundu anu ne’e tenke hakerek teze ho lian portugés no inglés. Tanba ne’e, ita hasa’e nia nivel uitoan kompara ho lisensiatura”, Afonso de Almeida ba Tatoli iha komemorasaun Dies Natalis UNTL nian ba dala-23, iha kampus sentrál, ohin.
Kursu mestradu hitu ne’ebé eziste ona, iha estudante 200-resin no tuir ona formasaun língua portugueza. Sira ne’e preparadu atu tama segundu anu iha tinan oin.
“Ba estudante 200-resin ne’e, UNTL sei haree sira-nian koñesimentu ba língua portugeza, tanba ida ne’e ezijénsia boot ne’ebé sai difikuldade ba rekursu sira. Karik sira bele ultrapasa kursu mestradu iha segundu anu ho di’ak, signifika sira iha duni abilidade sufisiente hodi entende saida maka sira aprende ona”, esplika.
Kursu mestradu iha UNTL mak iha área Ensinu Portugés iha Kontestu Timor-Leste, Estudu Pás no Konflitu, Dezenvolvimentu Komunitáriu, Medisina Tropikál, Saúde Komunitária, Ekonomia Jestaun Aplikada no Matemátika.
Afonso de Almeida salienta katak kursu sira ne’e, estudante maioria funsionáriu públiku tanba sira iha ona osan atu selu kursu tinan rua ne’e hamutuk rihun $3.
Aleinde kursu hitu ne’ebé iha, UNTL hakarak loke kursu mestradu foun lima, ne’ebé tolu hetan ona avaliasaun husi Ministériu Ensinu Superiór, Siensia no Kultura (MESSK) maka iha área Agrária, Enjeñaria no Polítika Públika.
“Ita hein de’it ona tanba ita-nian ministériu halo ona avaliasaun, kuandu rezultadu ba kursu tolu ne’e maka hetan ona lisensa operasionál ita bele loke ona. Ba kursu rua seluk ne’ebé atu loke tan maka iha área Direitu no Edukasaun. Ida ne’e foin planu”, katak.
Jornalista: Tomé Amado
Editora: Maria Auxiliadora
