VIQUEQUE, 18 novembru 2023 (TATOLI) – Xefe Suku Nahareca, José Martins Siqueira Lopes, dehan Suku Nahareca, maioria populasaun, seidauk asesu ba estrada no bee-moos.
“Ami iha Nahareca ne’e preokupa makas mak estrada no bee-moos, estrada ligasaun Nahareca ba Quelicai Baucau, Venilale Baucau no ba Uatulari no Ossu kondisaun grave tebes, tempu udan komunidade sira atu lori produtu lokál ba merkadu araska tebes, ha’u fiar katak Governu ne’ebé lidera hosi Primeiru-Ministru Kay Rala Xanana Gusmão bele tau atensaun mós mai Suku Nahareca”, José hateten ba Agência TATOLI iha Nahareca, sesta ne’e.
Nune’e mós, kona-ba bee-moos, komunidade sira tenke la’o dook, kuaze metru 50-resin mak foin bele asesu ba bee-moos ho nune’e difikulta tebes ema atu asesu bee-moos.
“Bee-moos, komunidade sira la’o dook oituan mak foin kuru, ida-ne’e tinan barak ona, ami fiar katak iha Governu ida-ne’e bele dada ona bee-moos mai ami, kona-ba eletrisidade, komunidade sira asesu hotu ona, só estrada ho bee-moos mak susar los”, nia hatete.
Xefe Suku sei prepara proposta hodi submete ba Postu Administrativu atu bele haruka ba munisípiu hodi manda ba nasionál atu Governu bele foti medida hodi dada bee-moos no hadia estrada ne’ebé daudaun ne’e grave hodi fó ameasa ba komuniade nia vida bainhira hala’o viajen.
Tuir dadus ne’ebé iha, populasaun Suku Nahareca hamutuk ema 2,000-resin
Jornalista: Hortencio Sanchez
Editór : Zezito Silva
