DILI, 18 novembru 2023 (TATOLI)–Governu liuhosi reuniaun extraordinária Konsellu Ministru, sábadu ne’e, aprova dekretu-lei kona-ba embarkasaun no servisu inspesaun tékniku ba ró, ne’ebé aprezenta hosi Ministru Transporte no Komunikasaun, Miguel Marques Gonçalves.
“Diploma ne’e estabelese norma, prosedimentu rejistu no servisu inspesaun ba utilizasaun ró no embarkasaun nasionál tuir padraun internasionál seguransa marrítima no protesaun ambiente mariñu (tasi) nian,” refere nota ne’ebé Agência Tatoli asesu, hafoin reuniaun ezekutivu iha Palásiu Governu.
Rejistu embarkasaun ró mai ho objetivu atu estabelese no regula rekezitu no prosedimentu sira ne’ebé sai hanesan baze ba atribuisaun nasionalidade timor-oan ba embarkasaun ró sira no direitu konsekuente hodi hasa’e bandeira timor-oan inklui kria no regula sira-nia rejistu.
Notísia relevante : MTK hakarak estabelese prosedimentu rejistu inspesaun ró-ahi no embarkasaun
Enkuantu, servisu inspesaun tékniku ba ró ho objetivu prinsipál atu garante seguransa navegasaun iha marrítima jurisdisaun Repúblika Demokrátika Timor-Leste no hodi prezerva meiu ambiente tasi nian. Ho dalan ida-ne’e, hakarak atu estabelese norma no prosedimentu ne’ebé vigora ba atividade kontrolu no inspesaun tékniku ró sira no sira-nia ekipamentu.
Aleinde ne’e, projetu dekretu-lei ne’e hakarak atu regulamenta sertifikasaun no akreditasaun inspetór sira, asegura prevensaun asidente navegasaun tuir norma internasionál Konvensaun Nasaun Unida kona-ba Direitu Tasi (SOLAS) ne’ebé Timor-Leste sai hanesan signatáriu.
Jornalista : Hortencio Sanchez
Editora : Julia Chatarina
