BAUCAU, 20 novembru 2023 (TATOLI) – Autoridade Administrasaun Munisipál Baucau hahú halo preparasaun hodi selebra loron Proklamasaun Unilaterál Independénsia ba dala-48 iha loron-28 novembru fulan ne’e.
Sekretáriu Autoridade Administrasaun Munisipál Baucau, Simão dos Santos Marques Pinhero, esplika, autoridade simu no hahú ezekuta orientasaun hosi nasionál kona-ba preparasaun komemora loron 28 novembru hanesan fó-sai despaxu ba komisaun organizadora inklui fahe tarefa serbisu ba postu administrativu sira iha munisípiu Baucau.
“Ita prepara masimu no di’ak tebes hanesan postu Baucau Vila sei hamutuk ho autoridade munisipál, enkuantu postu seluk prepara mesak iha kada postu,” Sekretáriu Administrasaun Munisipál Baucau hateten iha Vila Nova, segunda ne’e.
Autoridade Munisipál Baucau planeia sei hahú selebrasaun loron nasionál refere ho atividade sira hanesan kondekora medalla ba veternu hamutuk 188, toma pose ba xefi suku inklui isar bandeira iha resintu administrasaun Baucau.
Iha selebrasaun 28 novembru tinan-ne’e mensajen Prezidente Republika sei fó-sai liuhosi transmisaun direita nune’e autoridade husu kada postu administrativu sira estabelese mini komisaun organizadora hodi komunidade hotu bele partisipa no rona mensajen hosi xefi estadu.
Kona-ba serimónia kondekorasaun iha Baucau sei hala’o iha loron-27 novembru ne’ebé sei reprezenta hosi nasionál hodi atribui medalla kondekorasaun ba veteranu hamutuk 188 komposta hosi kada postu administrativu na&in-30.
“Iha reprezentante hosi governu sentrál liuhosi membru governu balun mak sei mai fó kondekorasaun ba veteranu iha Baucau,” Simão Pinheiro akresenta.
Autoridade Baucau seidauk iha informasaun kona-ba tipu medalla kondekorasaun refere maibé prosesu sira-ne’e maihosi Konsellu Veteranu Baucau mak deside no posibilidade sei atribui tuir grau ne’ebé kada kombatente sira kontribui luta to’o Timor-Leste hetan independénsia.
Selebrasaun loron nasionál independénsia ba dala-48 iha loron-28 novembru ho tema jerál ‘Selebra istória no konstrui futuru’ ne’ebé deside hosi governu sentrál liuhosi Ministériu Admistrasaun Estatal (MAE).
Autoridade Munisipál Baucau prevee orsamentu hamutuk $6.900 ne’ebé sei fahe ba kada postu administrativu sira ho valor $750. Enkuantu iha autoridade munisipál hamutuk ho postu Baucau Vila hamutuk $3.150 no sei aumenta tán $5.895 hodi organiza ba toma pose konsellu suku.
Jornalista : Natalino Belo
Editór : Evaristo Soares Martins
