BTL, E.P Viqueque finaliza ona identifikassun instalasaun kanu bee-moos iha Uatulari
VIQUEQUE, 20 novembru 2023 (TATOLI)—Bee Timor-Leste, Empreza Públika (BTL, E.P) finaliza ona identifikasaun ba instalasaun kanu transmisaun bee-moos iha postu Uatulari, munisípiu Viqueque.
“Ami halo ona identifikasaun finál iha terrenu, liu-liu ba fatin tau tanke rezervatóriu área instalasaun kanu transmisaun bee-moos ne’ebé balun kona abitante sira-nia kintál. Maski ami halo identifikasaun ikus, maibé sei hein konkordánsia hosi abitante sira hodi fó resposta pozitivu ba ami,” Koodenadór BTL,E.P, Marito da Costa, informa ba Agência Tatoli, iha postu Viqueque Vila, segunda ne’e.
Notísia relevante : BTL. E,P Viqueque rekolla reseita $14.000-resin durante fulan-10
Ekipa sei halo melloramenru sistema bee-moos iha suku rua hanesan Matahoi no Macadique iha Uatulari inklui administradór postu.
“Autoridade lokál hosi postu Uatulari tenke halo koordenasaun ho na’in ba bee-matan hosi postu Ossu molok atu dada bee-moos. Bainhira iha ona konkordánsia maka ami foin tama ba faze aprovizionamentu hodi halo konkursu,” nia akresenta.
Maski nune’e, BTL, E.P fó de’it apoia téknika, enkuantu rekursu bee, Administradór postu no Konsellu sulu mak halo koordenasaun ho na’in ba bee-matan.
“Oinsá maka ema bele oferese bee ba ita ho gratuita ka liuhosi prosesu kultura ruma depende hosi na’in ba rekursu,” nia tenik.
Rekursu bee-matan Ulu-Hira Uaiua, lokaliza iha suku Builo, postu administrativu Ossu ho débitu bee litru 60 pur segundu ho kapasidade bee boot.
“Ami hein katak tempu badak autoridade Uatulari bele halo negosiasaun ho na’in bee-matan no ami nafatin fó hanoin ba Autoridade Uatulari atu halo negosiasaun ho postu Ossu atu ami bele fornese ba postu Uatulari hodi abitante sira bele asesu bee,” nia espera.
Jornalista : Vitorino Lopes da Costa
Editora : Julia Chatarina
