DILI, 20 novembru 2023 (TATOLI)-Deputadu bankada CNRT iha Parlamentu Nasionál (PN), Albino da Silva, husu Ministériu Obra Públika (MOP) atu normaliza estrada iha suku Bebonuk, postu administrativu Dom Aleixo, munisípiu Dili, ne’ebé seidauk termina to’o ohin loron.
“Iha semana kotuk simu lamentasaun hosi komunidade kona-ba reabilitasaun estrada suku Bebonuk, postu administrativu Dom Aleixo, munisípiu Dili, hosi Leader ba iha tasi ibun Bebonuk nian. Obra ne’e paradu difulta tebes ba transporte públiku, hanesan mikrolete 03 dirasaun iha ne’eba hodi hala’o movimentu ba-mai. Iha tempu udan, estrada ne’e nakonu ho bee nalihun iha estrada laran. Iha tempu bailoro fali, Estrada nakonu ho rai-rahun ne’ebé fó ameasa tebes ba komunidade nia saúde, liuliu komunidade ne’ebé hela besik iha aredór ne’eba,” nia levanta liuhosi reuniaun plenária PN, segunda ne’e.
Estrada liuhosi kapela Bebonuk nia oin ne’e, nia dehan, estrada ne’e nakfilak tiha sai mota tanba bee balihun-aan iha estrada klaran.
Tuir informasaun hosi komunidade, reabilitasaun ba estrada ne’e hahú hosi 2014 ne’ebé responsabiliza hosi kompañia Idait Unipesoal, Lda, maibé to’o agora seidauk termina obra ne’e, tanba iha problema kona-ba indemnizasaun ba família uma-kain afetadu sira.
“Nune’e, hanesan reprezentante povu iha uma fukun PN husu ba Ministériu Obra Públika (MOP) atu bele buka solusaun ba asuntu ne’e, nune’e kontinua obra ne’e hodi bele komunidade suku Bebonuk asesu,” nia hateten.
Jornalista : Nelson de Sousa
Editór : Cancio Ximenes
