DILI, 20 novembru 2023 (TATOLI) — Governadór Banku Sentrál Timor-Leste (BCTL, sigla portugés), Helder Lopes, dehan kontribuisaun ba setór privadu sira sei menus ba investimentu ekonómiku.
“Tuir dadus iha 2022 katak ita-nia ekonomia iha ita-nia rain sei kiik tebes hanesan menus husi 30% signifika ita-nia ekonomia agora daudaun la’os investimentu setór privadu, maibé despeza ba Estadu nian. Nune’e tuir dadus hatudu katak kréditu husi banku sira ba setór privadu sei kiik hanesan menus husi 20%”, Helder Lopes destaka asuntu ne’e iha serimónia asembleia jerál anuál ordianáriu 2023 iha salaun Delta Nova Comoro, sesta-feira, foin lais.
Tuir nia, osan ne’ebé durante ne’e barak mak sai ba liur duké osan sirkula de’it iha Timor-Leste tanba timoroan sira rasik mak la prodús rasik sasan sira iha rai-laran.
“Osan ne’ebé mak durante sai ba liur mak barak duké iha ita-nia rain, entaun tuir dadus ne’ebé iha katak osan ne’ebé mak sai ba liur hodi sosa sasan besik billaun $1, signifika ita la prodús sasan iha rai laran no ita labele absolve atu osan ne’e tenke sai”, nia dehan.
Governadór BCTL mós nota katak durante ne’e partispasaun iha forsa traballu kiik tebes bainhira kompara ho nasaun sira seluk, entaun ida-ne’e konsidera problema sériu iha Timor-Leste.
“Ha’u atu partilla iha fatin ida-ne’e katak partispasaun iha forsa traballu kiik tebes bainhira ita komapra ho nasaun sira seluk, ita porvolta 30%, entaun ida-ne’e ita konsidera problema sériu tanba ita-nia populasaun maioria joven, maibé joven sira ne’e ba buka servisu iha merkadu traballu sira, maibé servisu la iha tanba setór privadu la halo investimentu, entaun ida-ne’e problema ba ita hotu nian atu hadia ba futuru”, nia konklui.
Iha fatin hanesan, Prezidente Kámara Komérsiu no Indústria Timor-Leste (CCI-TL), Jorge Serano, prosede asembleia jerál anuál ordináriu ne’ebé importante hodi diskute hamutuk entre setór privadu sira kona-ba planu no atividade ekonomia iha rai-laran.
Partisipa hosi serimónia ne’e mai hosi membru Governu liu husi Sekretáriu Estadu Kooperativa (SEKOOP) no mós Banku Sentrál Timor-Leste (BCTL).
Jornalista : Felicidade Ximenes
Editór : Zezito Silva
