DILI, 20 novembru 2023(TATOLI) – Unidade Polísia Marítima(UPM), hamutuk ho Servisu Informasaun Polísia (SIP), halo apreensaun ba sigaru ilísitu Surya 12, Marboro no Exa. Hirak ne’e hamutuk kaixa 30 inklui ai-kameli saku ida ne’ebé sidadaun timoroan sira mak hatama hosi Indonézia mai Timor-Leste liuhosi tasi iha área Liquiça.
Evidénsia sira hanesan sigaru, sidadaun timoroan ho insiál LSM mak hatama mai hosi Indonézia atu mai faan iha Díli, enkuantu ai-kameli saku ida-ne’e hatama hosi sidadaun insiál RDA atu ba Esporta Haruka ba rai li’ur.
Nia konta, UPM no SIP simu informasaun iha segunda (20/11) tuku 4:00 madrugada katak deskonfia katak iha sidadaun balun hatama sasan ilegál iha tasi ibun Liquiça área Tibar nian.
Hafoin ida-ne’e, ekipa konjunta tún kedan ba lokál krime no no ekipa haree duni katak iha sidadaun timoroan balun halo tranzasaun ilegál no hatama sasan ilísitu balun mai Timor-Leste atu faan iha mekadu.
“Ita-nia polísia marítima no Servisu Intelijénsia lokaliza kedan sidadaun sira ne’e no halo kedan apreensaun ba evidénsia sira ne’e no hetan sigaru Surya, Marlboro, Exa hamutuk kaixa 30 inklui Ai-Kameli saku ida. Ita-nia ekipa konjunta halo kedan apreensaun ho fráglante delitu no agora ita asegura ona sasan sira iha kuartel UPM”, Komandante Polísia Marítima Superintendente Polísia, Eugénio Pereira, dehan ba TATOLI iha nia kna’ar fatin Seonál, segunda ne’e.
Nia dehan, iha apreensaun ne’e indentifika iha ema nain ruma mak sai hanesan nain ba sasan sira ne’e.
“Bainhira ita-nia ekipa konjunta sira halo apreensaun, ita-nian sidadaun sira tenta halai hosi polísia nia kontrola, maibé depois ida-ne’e ita PNTL lokaliza kedan sira nian paradeiru no agora ita asegura ona ema nain rua ba kazu ida-ne’e ho fragálante delitu”, nia adinta.
“Sidadaun sira ne’e nu’udar nain ba iha evidénsia sira ne’e no agora ita asegura hodi lori ema nain rua ne’e mai iha ne’e (kuartel UPM) hodi submete ba prosesu investigasaun”, nia konklui.
Jornalista: Natalino Costa
Editór : Zezito Silva
