DILI, 21 novembru 2023 (TATOLI) – Ministru Transporte no Komunikasaun (MTK) Miguel Manetelu, dehan Governu sei halo estudu viabilidade ba portu tolu iha 2024, portu hirak ne’e mak Cairabela, Com no Ataúro.
“Tinan oin ita iha de’it osan uitoan ba infrastrutura atu bele halo estudu viabilidade no halo dezeñu de’it ba portu sira hanesan Cairabela Baucau, Com Lautem no Ataúro, ne’ebé mak programa Governu ida-ne’e tau ona prioridade hodi konstrui iha tinan 2025”, Ministru Manetelu hateten ba jornalista sira iha Palásiu Governu, ohin.
Portu tolu ne’ebé atu halo estudu viabilidade mak hanesan Cairabela Baucau, Com Lautem no Atauro no bele mellora tan Oe-Cusse.
“Estudu viabilidade ita sei halo ba portu tolu Cairabela, Com no Ataúro no bele mellora tan ida Oe-Cusse halo di’ak liu tan”, nia friza.
Kona-ba portu Dili, iha hela prosesu nia laran maibé sei hein orientasaun hosi Primeiru-Ministru Kay Rala Xanana Gusmão atu transforma Portu Dili sai nu’udar portu krujeiru.
Iha parte seluk, Orsamentu Jerál Estadu (OJE) tinan 2024 ba MTK hamutuk millaun $12 hodi halo operasionál ba servisu ministériu nian hanesan saláriu vensimentu, kapitál menór hamutuk rihun $34 atu estabelese Diresaun Transporte Telekomunikasaun iha munisípiu lima mak hanesan, Manatuto, Ainaro, Aileu, Ermera no Liquiça.
Tuir nia, orsamentu ba estudu viabilidade portu tolu sei prevé hosi Fundu Infrastrutura.
“Orsamentu ba estudu biabilidade ne’e mai hosi Fundu Infrastrutura, maibé montante ha’u ladun lembra maibé ita iha osan ba ida-ne’e”, nia hakotu.
Jornalista: Hortencio Sanchez
Editór : Zezito Silva
