DILI, 21 novembru 2023 (TATOLI) – Ministru Transporte Komunikasaun (MTK), Miguel Manetelu, dehan Asian Development Bank (ADB) halo hela estudu viabilidade atu moderniza sirkulasaun transporte Terrestre.
“ADB halo hela estudu viabilidade ida ba transporte públiku, semana kotuk ha’u bolu ona sira atu hatene kona-ba estudu ne’e nia finalidade to’o ona iha ne’ebé, maibé sira sei iha aprezentasaun ida depois mak ita deside”, Ministru Manetelu hateten ba jornalista sira iha Palásiu Governu, ohin.
Maibé Governu sei haree didi’ak planu ADB nian hafoin foti desizaun tanba planu sira hanesan ne’e atu lori Timor-Leste ba empréstimu.
“Sasan sira hanesan ne’e ita tenke haree didi’ak tanba hahú estudu sira hanesan ne’e atu lori ita ba empréstimu, entaun ita tenke kuidadu ho sasan hirak ne’e mak ha’u hakarak haree uluk sira nia planu lolos ne’e, ezemplu hanesan iha tinan ida ita halo uluk saida, tinan oin ita halo fali saida, sé Governu ida-ne’e nia mandatu la konsege halo hotu, Governu tuir mai tenke kontinua”, nia hatete.
Nia salienta, ministru konsidera ADB hakarak duni halo modernizasaun ba transporte terrestre hanesan, iha terminál ne’ebé di’ak, sistema sira iha dalan maibé tenke haree mós ba realidade ne’ebé iha.
“Ita tenke la’o tuir realidade ne’ebé iha, atu nune’e ita bele halao dezenvolvimentu ida ho kualidade, ita labele hanoin ohin ita halo buat ida hanesan kedan Singapura, ne’e labele, ita tenke la’o neneik maibé loron ida ita sei to’o iha saida mak ita hakarak”, nia hakotu.
Jornalista: Hortencio Sanchez
Editór : Zezito Silva
