DILI, 21 novembru 2023 (TATOLI) – Prezidente Repúblika, José Ramos Horta, destaka kona-ba importánsia edukasaun no saúde ne’ebé kualidade ba labarik sira iha Timor-Leste.
“Ita tenke fó importánsia hodi tau prioridade ba saúde no edukasaun ba labarik sira iha Timor-Leste, labarik hotu tenke tenke asesu ba edukasaun ho kualidade no nutrisaun ne’ebé adekuadu”, Prezidente Horta dehan iha Palásiu Prezidensiál, ohin.
Prezidente rekoñese katak sei iha dezafiu signifikativu atu asegura labarik sira-nia moris di’ak iha Timor-Leste.
“Má-nutrisaun tanba falta asesu ba bee-moos ne’ebé seguru no limitasaun ba servisu saúde preventivu, primáriu no laiha fasilidade saúde ne’ebé besik sira kontinua impede kresimentu no dezenvolvimentu saudavél labarik sira-nian”, nia hateten.
Antes ne’e, Prezidente Horta mós fó advokasia atu promove ambiente ida-ne’ebé kontribui ba labarik sira-nia dezenvolvimentu olístiku.
Tanba ne’e, Xefe Estadu husu atu haka’as aan hodi kria oportunidade ba labarik sira atu esplora sira-nia poténsia, dezenvolve abilidade no dezenvolve iha ambiente ida-ne’ebé fó apoiu no domin.
“Ita hakarak labarik hotu iha Timor-Leste atu sai boot iha ambiente ida-ne’ebé apoia sira-nia dezenvolvimentu integradu”, nia friza.
“Ita tenke haka’as aan atu hatudu katak labarik hothotu iha oportunidade atu esplora sira-nia poténsia, dezenvolve sira-nia abilidade no haburas sira-nia ambiente domin nian no protesaun nian”, nia argumenta.
Iha oportunidade ne’e Prezidente Horta hato’o mensajen kona-ba Loron Universál Labarik nian ne’ebé selebra ona iha segunda (20/11).
“Futuru ida-ne’ebé di’ak liubá labarik hothotu hodi ko’alia liu kona-ba responsabilidade koletiva hodi asegura katak labarik hothotu iha Timor-Leste iha oportunidade atu hetan susesu no atinje sira-nia potensialidade tomak”, nia konklui.
Jornalista: Hortencio Sanchez
Editór : Zezito Silva
