DILI, 21 novembru 2023 (TATOLI) – Ministra Solidariedade Sosiál no Inkluzaun (MSSI), Verónica das Dores, relata razaun la envolve programa bolsa da mãe jerasaun foun iha Orsamentu Jerál Estadu (OJE) tinan 2024 tanba Governu da-sia iha programa prioridade rasik.
“Ami mai esplika ba Prezidente Repúblika kona-ba programa bolsa da mãe jerasaun foun, ita la envolve iha Orsamentu Jerál Estadu tinan 2024 tanba Governu ida-ne’e iha nia programa rasik tanba iha kampaña polítika partidu CNRT nian katak bainhira manán sei la kontinua programa ida-ne’e, ne’e mak ita la kontinua”, ministra dehan ba jornalista sira iha Palásiu Prezidensiál, ohin.
Nia esplika, Governu ida-ne’e sei la hapara bolsa da mãe hotu maibé só hapara de’it mak bolsa da mãe jerasaun foun.
“Bolsa da mãe ne’e iha rua, ne’ebé la’o hanesan, bolsa da mãe kondisionál ne’e ba maluk vurneravél sira ne’ebé hahú kedan iha 2008 to’o agora, maibé iha VIII Governu mai kontinua fali ho jerasaun foun, entaun ami haree ladún iha kondisaun entaun ami hasai no mai esklarese ba Prezidente Repúblika, bolsa da mãe ne’e ita sei la hapara hotu só hapara de’it mak jerasaun foun ne’e”, nia revela.
Polítika Governu nian hasai bolsa da mãe jerasaun foun hodi troka fali ho pakote nutritivu ba inan isin rua sira maibé la’os ona ho osan.
“Entaun bolsa da mãe jerasaun foun nia pagamentu sei remata iha dezembru tinan 2023, ita sei kontinua fali ho pakote nutritivu ba inan isin rua sira”, nia hakotu.
Jornalista: Hortencio Sanchez
Editór : Zezito Silva
