VIQUEQUE, 21 novembru 2023 (TATOLI)—Servisu Notariadu munisípiu Viqueque daudaun ne’e laiha blanku Bilhete de Identidade (BI) no sertidaun moris desde fulan-outubru, nune’e ofisiál ne’ebé halo atendimentu públiku distribui suratan mutin ba sidadaun ne’ebé hakarak trata dokumentu.
“Ami informa ona ba nasionál maibé seidauk distribui mai Viqueque. Nune’e ami prodús ho surat-tahan mutin maka distribui ba ita-nia abitante sira ne’ebé maka mai trata sira-nia dokumentu, bainhira blanku mai ona maka prosesu fali blanku orijinál ba abitante sira,” Diretór Servisu Notáriadu munisípiu Viqueque, Rogério da Costa, informa iha ninia knaar fatin, Beloi, tersa ne’e.
Notísia relevante : Notariadu Viqueque laiha blanku rejistu kriminál
Nia dehan, atendimentu públiku ba dadeer no lorokraik, maibé sidadaun ne’ebé trata dokumentu barak, enkuantu rekursu halo atendimentu menus, tanba ne’e atendimentu tarde.
“Daudaun ne’e funsionáriu permanente na’in-haat no funsionáriu kazuál na’in-haat, nune’e hamutuk na’in-ualu maka halo atendementu ba abitante unisípiu Viqueque,” nia akresenta.
Hahú fulan-janeiru to’o outubru, Serbisu Rejistu Sivíl munisípiu Viqueque konsege prodús ona dokumentu sertidaun moris hamutuk 5.962, sertidaun kazamentu 33, sertidaun óbitu 52, BI foun hamutuk 7.891, renovasaun BI hamutuk 2.744, no rejistu kriminál 1.542.
“Ami taka sai hotu kritériu prosesu atu trata dokumentu iha kuadru avizu hodi fasilita abitante sira trata dokumentu,” nia hato’o.
Jornalista : Vitorino Lopes da Costa
Editora : Julia Chatarina
