iklan

DEFEZA, HEADLINE

Empreza PT Parentjana Djaja entrega ba MD dezeñu futuru instalasaun Kampus IDN

Empreza PT Parentjana Djaja entrega ba MD dezeñu futuru instalasaun Kampus IDN

Ministru Defeza, Donaciano Costa Gomes “Pedro Klamar Fuik”. Imajen Tatoli/Egás Cristóvão

DILI, 22 novembru 2023(TATOLI) – Empreza PT Parentjana Djaja hosi Indonézia submeter ona dokumentu ofisiál kona-ba dezeñu finál ba futuru instalasaun Kampus Institutu Defeza Nasionál (IDN) ne’ebé sei halo iha Suku Liurai, Postu Aileu Vila, Munisípiu Aileu ba Ministru Defeza (MD), Kontra-Almirante Donaciano Costa Gomes Pedro ‘’Klamar Fuik’’.

Serimónia entrega ne’e direta hosi Diretór Konsultan Empreza PT Perentjana Djaja, Irsa Said, ba Ministru Defeza Pedro Klamar Fuik ne’ebé akompaña hosi Diretór Interinu IDN, Guilherme Soares no asina nota ofisiál hodi hatudu katak dezeñu ne’e entrega ona hosi empreza.

Empreza PT Perentjana Djaja halo dezeñu ba futuru instalasaun Kampus IDN iha Aileu ho duransaun fulan 14, tuir kontratu ne’ebé Ministériu Defeza fó ba empreza ne’e konta hosi outobru 2022 to’o finaliza iha loron 21 novembru 2023.

Hafoin kompañia PT Perentjana Djaja entrega tiha dezeñu ne’e iha Munisípu Aileu mak Ministériu Defeza sei loke konkursu hodi hakat ba faze kontrusaun.

Klamar Fuik, agredese ba reprezentante sira husi liña ministériu relevante, ne’ebé akompaña dezeñu projetu IDN, dezde ínisiu. tanba ne’e Projetu orijinál ne’ebé konseptualiza husi IDN, ho objetivu atu defíne karateristika, funsionalidade no kondisaun hotu.

“Ita bo’ot sira hatene, dezde prinsípiu, IDN, inisia nia funsaun iha tinan 2010, laiha fatin própriu hodi dezenvolve nia misaun ba futuru lideransa, planeadór sira no pensadór sira ba nasaun ne’e. Nune’e mosu hanoin katak presiza iha duni espasu, hodi orienta ema-nia hanoin, iha fatin ne’ebé nia servisu ho seguru, hodi karateriza no transforma ema tuir visaun Estadu nasaun nian”, hateten governante ne’e iha auditóriu IDN, Palásiu Governu liuhosi Komunikadu ne’ebé TATOLI asesu, kuarta-feira.

Iha fatin hanesan, Diretór Interenu IDN , Guilherme Soares, agradese ba Ministru Defeza nia esforsu hodi atinje realizasaun dezeñu ba instalasaun futuru kampus IDN iha ne’ebé sei konstrui iha Aileu.

Diretór IDN interinu mós agradese ba ministériu MOP, ADN, EDTL EP, BTL EP, ne’ebé sempre ho pasensia hodi akompaña prosesu dezeñu futuru instalasaun ba Kampus IDN to’o remata.

Jornalista: Natalino Costa

Editór : Zezito Silva 

 

iklan
iklan

Leave a Reply

iklan
error: Content is protected !!