Bobonaro, 22 novembru 2023 (TATOLI) – Ministériu Saúde (MS) fó sensibilizasaun informasaun ba komunidade sira atu hasa’e konsiénsia komunidade nian ba moras hadaet no la hadaet sira iha Postu Administrativu Cailaco, Munisípiu Bobonaro.
”Atividade ida-ne’e lidera husi Ministériu Saúde atu hasa’e autoridade sira-nia koñesimentu liu liu ba área saúde maternál infantíl no mós ba moras hadaet no mós moras la hadaet sira inklui programa má nutrisaun no dengue, husi ne’e oinsá atu hasa’e konsiénsia komunidade nian atu prevene aan”, Reprezentante MS, Agosta Amaral, informa ba jornalista iha Sede Suku Meligo, Postu Administrativu Cailaco.
Nia dehan, informasaun sira ne’e, ekipa MS sei la’o hotu ba Munisípiu Bobonaro hodi hatutan moras sira ne’e ba komunidade sira atu sira bele prevene aan tanba haree katak banhira la kuidadu aan mak moras ne’e aumenta ba bebeik.
”Ita-nia objetivu atu fahe informsaun tuir MS nia relatóriu katak ita iha indikadór ka atinjimentu ne’e seidauk envolve makas iha komunidade sira, entaun ita presiza hasa’e tan autoridade sira-nia koñesimentu hodi hatutan ba komunidade sira hodi hola parte, ezemplu; hanesan inan isin rua tenke vizita fasiliadade saúde to’o partu entaun husi informasaun sira bele hanorin inan sira atu hakbesik nafatin ba fasilidade saúde ne’ebé mak besik hodi hetan tratamentu husi médiku sira”, nia informa.
Nia haktuir, husi kampaña ida-ne’e, ekipa MS fahe informasaun ba komunidade sira atu iha mudansa atitude ba moras sira ne’ebé mak eziste.
Iha fatin hanesan, Reprezentante Administradór Cailaco, Munisípiu Bobonaro, Luis Soares Gonçalves, hateten atividade ohin ne’e importante tebes atu fahe ba komunidade sira atu bele prevene aan husi moras hotu.
”Hau sente orgullu ba atividade ida-ne’e atu hato’o ba komunidade sira atu bele halo mudansa karatér ita ema nian ba ita-nia saúde”, Luis Soares esplika.
Nune’e mós, Xefe Sentru Saúde Cailaco, Anina Afonso Gonçalves, dehan atividade ida-ne’e importante ba profisionál saúde inklui komunidade sira rona direta informasaun sira oinsá muda hahalok ba moris nian atu bele kuida sira nia aan ba moras hotu.
Jornalista :Felicidade Ximenes
Editór : Zezito Silva
