ADB fó formasaun ba funsionáriu EDTL kona-bá tékniku seguru vida

DILI, 23 novembru 2023 (TATOLI) – Banku Dezenvolvimentu Aziátiku (ADB, sigla Ingles) fó formasaun ba funsionáriu Eletricidade De Timor-Leste (EDTL) kona-bá tékniku seguru hodi iha abilidade bainhira ba tereñu bele utuliza ekipamentu tuir padraun hodi salva nia vida.

“EDTL serbisu hamutuk ho ADB hodi fó formasaun iha área safety education. Ida ne’e pertinente tebes oinsá atu kapasita ita nia funsionáriu sira serbisu iha tereñu no utiliza ekipamentu sira tuir nia padraun hodi bele salva sira nia vida”, hatete Prezidente EDTL, Paulo da Silva, iha Caicoli-Dili.

Nune’e, nia husu ba funsionáriu sira atubele aproveita oportunidade hodi aprende kona-bá salva no seguru moris hodi utuliza ekipamentu.

“Formasaun sira ne’e bele tau iha prátika, tanba seguru ne’e atu salva vida no fasilidade. Ita bo’ot sira bele aprende máximu iha prosesu formasaun hodi bele aplika iha serbisu”,nia agradese.

Iha biban hanesan, Konsultan husi ADB, Aloysius Leste Prabhancana Kusumo, hateten formasaun ne’e atu ajuda funsjonáriu sira oinsá asegura ka salva moris bainhira hala’o serbisu eletrifikasaun.

“Formasaun ida ne’e, importante tebes ba EDTl atubele utiliza mós iha industria tuir regra kona-bá seguru no salva vida” nia afirma.

Formasaun ne’e, nia dehan iha relasaun área espesifika sira hanesan servisu iha tower listrik, atendimentu ba fiu sira, seguru no salva moris iha operasaun eletrisidade, bio-saúde no bio-asap, transporte ema iha operasaun no seluk-seluk tan.

“Área sira ne’e iha hotu ona manuál nia laran kona-bá protesaun ba ema no ekipamentu sira ne’ebé atu uza”, nia dehan.

ADB ho EDTL, E.P sei kontinua formasaun ne’e ba funsionáriu EDTL sira iha munisípiu hotu atu serbisu tuir regra seguru vida.

Jornalista: Jesuína Xavier

Editór     : Florencio Miranda Ximenes