DNSI sensibiliza lei migrasaun no azilu ba abitante Viqueque
VIQUEQUE, 23 novembru 2023 (TATOLI)—Diresaun Nasionál Servisu Imigrasaun (DNSI), kinta ne’e, sensibiliza lei nú. 10/2021 hosi primeiru alterasaun lei nú. 11/2017, 24 maiu kona-ba lei migrasaun no azilu ba abitante iha Viqueque.
Inisiativa ne’e atu hasa’e koñesimentu partisipante hodi hato’o filafali informasaun ba sidadaun seluk iha área rurál.
“Ami-nia knaar atu halo kontrola movimentu sidadaun estranjeiru sira ne’ebé tama no sai liuhosi fronteira portu no aéroportu iha territóriu nasionál. Aleinde ne’e, ami halo kontrolu permanente ba sidadaun estranjeru sira ne’ebé mai halo atividade sira hanesan negósiu inklui ema estranjeiru kaben ho timor-oan (mistura),” Reprezentante Nasionál Servisu Imigrasaun no atuál Xefe Departamentu Apoia Servisu Administrasaun Migrasaun, Júlio Abílio Desa, informa, durante abertura sensibilizasaun lei, iha salaun munisípiu Viqueque.
Notísia relevante : PN aprova projetu-lei migrasaun no azilu iha jeneralidade
Júlio Abílio dehan, hanesan ezijénsia ba diresaun hodi halo sensibilizasaun lei ba abitante sira ne’ebé menus informasaun, nune’e atividade ne’e tuir planu sei realiza iha munisípiu sia.
“Ami halo sensibilizasaun iha munisípiu Viqueque tanba foin lalais ami foti ema estranjeiru iha postu Ossu. Bazeia ba dadus estatístika, movimentu sidadaun estrajeiru iha Viqueque mós kontra tanba balun fa’an sasán hanesan pedagan kaki lima. Ami foti ema estranjeru kuaze dala-haat iha Viqueque, iha tinan 2023 nia laran. Tanba ne’e, ami presiza halo sensibilizasaun ba abitante sira, liu-liu ba autoridade lokál hodi bele hatutan informasaun ba komunidade iha área rurál,” nia akresenta.
Biban ne’e, nia husu ba abitante sira, bainhira hetan ema estranjeiru halo movimentu tama sai iha aldeia, suku no postu sira, tenke fó hatene ba autoridade lokál no informa ba Polísia Nasionál Timor-Leste (PNTL) nune’e bele fó hatene ba Migrasaun hodi halo identifikasaun.
“Ho kestaun sira-ne’e maka ami halo sensibilizasaun, karik aban bain-rua akontese iha ita-nia hela fatin, abitante sira labele hamosu tan konfuzasaun, maibé informa ba autoridade lokál no seguransa,” Reprezentante Migrasaun fó hanoin.
Iha fatin hanesan, Adiministradór munisípiu Viqueque, Januário Soares ‘Bolly’, konsidera atividade ne’e importante ba abitante sira tanba sempre halo movimentu tama sai hosi nasaun ida bá nasaun seluk, nune’e kada nasaun mós presiza iha lei hodi regula movimentu migrasaun.
“Tanba ne’e, ita-nia estadu kria lei hodi regulariza ema atu labele tama sai arbiru,” nia tenik.
Atividade ne’e partisipa hosi Diretór munisípiu Viqueque, Autoridade lokál, Polísia Nasionál Timor-Leste (PNTL) Eskuadra Ossu, Eskuadra Viqueque no estudante sira iha munisípiu Viqueque.
Jornalista : Vitorino Lopes da Costa
Editora : Julia Chatarina
