DILI, 23 novrmbru 2023 (TATOLI) – Portavóz Organizasaun Joven Buka Hatene (JBH), Jeronimo Omego Martins da Cruz, lamenta Ministériu Administrasaun Estatál liuhosi komisaun organizadora 28 novembru ba komemorasaun loron proklamasaun independénsia unilaterál Timor-Leste ne’ebé ko’a-sai fotografia fundadór ka líder nasionál no istóriku balun hanesan Mari Alkatiri, hodi tau iha banner no konvite sira,tanba la tuir faktu istóriku loos.
“Ita konsidera foto refere la kompletu, nune’e ami nu’udar joven hakarak tane a’as ita nia istória luta ukun rasik aan. Tanba ne’e husu atu hadi’a ka troka banner sira ne’ebé monta ona iha kapitál Dili tanba la tuir ona faktu ka istória loos”, lamenta Portavóz ne’e liuhusi konferénsia imprensa, iha Colmera-Dili
Notísia relevante: FRETILIN lamenta komisaun organizadora 28 Novembru ko’a-sai fotografia líder nasionál balun
Aktu ne’e, nia konsidera komisaun organizadora nega faktu no istória reál hodi ko’a sai eis Primeiru-Ministru Bin Amude Alkatiri husi fotografia orijinál.
Nune’e, nia husu ba Prezidente Repúblika, José Ramos Horta no Xefe Governu, Xanana Gusmão atu fó xamada atensaun no husu responsabilidade ba governante tutela ba selebrasaun 28 novembru atubele hatu’ur loloos.
“Ami husi Ministériu Administrasaun Estatál, Tomas Cabral atu atua nu’udar governante maduru no responsável hodi hatun hotu banner sira ne’ebé hasai fundadór balun nia oin iha kapitál atu tau fali foto orijinál hodi jerasaun foun sira ne’ebé haree no akompaña istória loos”, nia husu.
Nia sujere mós ba Sentru Nasionál Chega nu’udar institutu públiku ne’ebé servisu mós ba prezervasaun memoria istóriku atu haree didi’ak fotografia ne’ebé mak fó sai iha públiku liuhusi MAE.
Iha fatin hanesan, Joven Marcelino Martins husu ba MAE atu troka banner sira no laiha razaun forte katak laiha espasu hodi tau fundadór hotu nia fotografia, tanba iha ema profisionál hodi halo banner ho ema barak nia fotografia.
“Ami husu tenke troka hotu banner ne’ebé monta ona iha kapitál Dili tanba la tuir faktu istóriku iha tinan 28 nobembru 1975”, nia lamenta.
Tuir observasaun ne’ebé mak iha, iha banner ne’e, alende ko’a sai fotografia, Marí Alkatiri, hanesan komisáriu polítiku nasionál no Ministru asuntu Polítiku iha dékade haat-resin liubá, iha mós Xanana Gusmão atuál Primeiru-ministru inklui José Ramos Horta, atuál Xefe Estadu, ne’ebé la’o hamutuk, la tuir fotografia orijinál loloos.
Notísia relevante: Fotografia istórika proklamasaun 28 novembru iha “Billboard” foti hosi dokumentasaun 2021-2022
Jornalista: Jesuína Xavier
Editór : Florencio Miranda Ximenes
