Kréditu Uniaun Feto Empreendedorismu hakarak apoiu membru sira iha negósiu
DILI, 22 de novembru 2023 (TATOLI) – Prezidente Kooperativa Kréditu Uniaun Feto Empreendedorismu, Agusta da Silva, hateten kooperativa hakarak apoiu membru sira hodi halo atividade negósiu hodi hadi’a ekonomia uma familia.
“Objetivu prinsipal husi kriasaun kooperativa uniaun maka atu ajuda membru sira bele hetan impréstimu hodi hala’o negósiu. Iha etapa primeiru ami fó empréstimu $100 no tuir mai hetan $300,” Prezidente Koperativa Kréditu Uniaun Feto Empreendedorismu, Agusta da Silva ba TATOLI, iha Faról Dili, kuarta ne’e.
Nia esplika rekezitus ida maka membru sira tenki rejistu hodi sai ona membru durante fulan-tolu molok atu hetan impréstimu hosi Kooperativa Kréditu Uniaun Feto Empreendedorismu.
Kooperativa Kréditu Uniaun Feto Empreendedorismu hahú ona atividade kooperativa ho membru 32 ne’ebé lansa ofisialmente iha tinan 2022 atu bele investe osan hamutuk no fó emprestimu ba membru sira.
“Hahú voluntariamente ema na’in rua no to’o 32 hodi harii kooperativa. Atu sai membru tenki hatama osan 25 ba poupansa inisiál, $10 administrasaun, poupansa obrigatóriu no voluntáriu $ 6 ba kada fulan ne’ebé membru sira hatama fulan-fulan,” nia hateten.
Nia relata to’o oras ne’e, Kooperativa Kréditu Uniaun Feto Empreendedorismu iha ona membru hamutuk 72 kompostu husi feto 65 feto no mane hitu. Bainhira benefisiariu ida husu kreditu ba kooperativa ho montante $100 sei aplika jurus pursentu tolu kada fulan ne’ebe obrigatoriu tenki selu.
“Feto tenki brani nafatin la’o ba oin, importante mak ne’e ita nia vontade no responsabilidade hodi la’o ba oin. Se monu, hamrik la’o nafatin ba oin labele depende de’it ba laen kaben atu dezenvolve negósiu, hamrik metin nafatin foti risku, tamba buat hotu iha solusaun, forsa nafatin,”nia hateten.
Jornalista: Jesuína Xavier
Editor: Agapito dos Santos
