Timor-Leste hakarak koopera ho nasaun sira iha sudeste aziátiku iha setór edukativu  

DILI, 23 novembru 2023 (TATOLI) – Ministériu Ensinu Superiór Siénsia no Kultura (MESSK) Timor-Leste sei reforsa kooperasaun ho nasaun sira iha rejiaun sudeste aziátiku hodi haruka estudante timoroan sira bá kontinua estudu iha área turizmu, peska no enjeñaria.

Ministru tutela, José Honório Jerónimo, informa katak ba asuntu ne’e, iha 2024, Governu sei fó bolsa estudu ba estudante sira tuir área ne’ebé define hodi kontinua sira-nian estudu, nune’e bele mai dezenvolve nasaun.

“Ami halo ona diskusaun iha Konsellu Administrasaun Fundu Dezenvolvimentu Kapitál Umanu atu haree ka define prioridade ba tinan oin tuir nesesidade ne’ebé mak iha hodi atribui bolsa estudu ba joven sira ne’ebé iha kapasidade intelektuál no iha koñesimentu di’ak ba língua ingleza no portugueza atu haruka bá iha Filipina, Malázia, Coreia do Sul no Portugál, liuliu iha turizmu, peska no enjeñaria, tanba nasaun hirak ne’e iha nível edukasaun avansadu liu”, ministru afirma ba Tatoli iha Colmera.

Polítika Governu nian hatuur ona atu garante kualidade edukasaun iha Timor-Leste durante tinan lima nia laran. Tanba ne’e, governante halo ona enkontru ho Embaixadór Timor-Leste ba Filipina hodi ko’alia oinsá atu hametin kooperasaun ho nasaun refere iha área edukasaun.

“Ami diskute buat balun, tanba ita haree ba futuru, sé ita hakarak tama ba ASEAN, ita mós tenke tau atensaun ba ensinu superiór hodi halo kooperasaun ho nasaun sira hanesan Filipina. Tanba ne’e mak kooperasaun ho Governu Filipina ne’e importante inklui Malázia nomós país sira seluk”, salienta.

Iha oportunidade ne’e mós ministru no embaixadór aborda mekanizmu di’ak atu foti dadus estudante timoroan ne’ebé atualmente frekuenta hela estudu iha Filipina nomós atu identifika ensinu superiór sira ne’ebé kualidade liu.

“Bainhira ita hakarak hanoin ba futuru atu loke politékniku turizmu, ita mós tenke haree ba área turizmu ne’e importante. Ita haruka joven sira bá foti mestradu au mezmu tempu sé ita hanoin ba futuru hakarak loke akademia peska iha Manatuto, tenke haruka joven sira bá estuda iha área peska. Sé ita hanoin hakarak loke enjeñaria iha Covalima, ita mós tenke haruka joven sira bá estuda iha área refere”, salienta.

Iha reuniaun Konsellu Administrasaun Fundu Dezenvolvimentu Kapitál Umanu ne’e halo mós diskusaun téknika hodi avalia ba esperiénsia iha tinan hirak liubá bainhira harii Institutu Politékniku Betano no iha kondisaun ida ne’ebé mínima, maibé agora la’o di’ak ona. “Esperiénsia sira ne’e hatudu sé Timor-Leste hakarak estabelese Institutu Politékniku Turizmu iha Lospalos, kondisaun sira ne’e presiza fó atensaun liután”.

MESSK iha obrigasaun atu haree asuntu ida ne’e ho nível tékniku sira tanba planu sira ne’e tama iha programa Governu nian. “Buat importante liu mak komisaun koordenadora ne’ebé atu haree ba ensinu superiór sira no institutu superiór sira iha Timor-Leste laran tomak atu Governu bele fó apoiu iha parte ida ne’ebé, nune’e ba tinan oin ita sei tau prioridade ba ida ne’e”, realsa.

Jornalista: Tomé Amado

Editora: Maria Auxiliadora