DILI, 23 novembru 2023 (TATOLI) – Sekretáriu Estadu Formasaun Profisionál no Empregu (SEFOPE) fó apoiu fundu ho totál $279,670.50 ba grupu auto-empregu hamutuk 44.
“Objetivu husi apoiu ne’e atu dezenvolve sira nia negósiu no investimentu ba sira nia-aan rasik, tanba la hetan oportunidade serbisu sai funsionáriu públiku, Organizasaun Naun Governamentál no rai li’ur. Maibé sira abilidade no kapasidade hodi dezenvolve negósiu ki’ik sira atu sustenta sira grupu”, hatete Sekretáriu Estadu Formasaun Profisionál no Empregu (SEFOPE), Rogério de Araújo Mendonça, iha Caicoli-Dili.
Fundu ne’e, nia dehan 40% atu kompra ba ekipamentu no ekipa SEFOPE ba verifika di’ak mak sei transfere 60% ba grupu auto-empregu sira.
Grupu auto-empregu sira ne’e investe iha munisípiu 11 iha área ortikultura, peska, haki’ak manu broiller, ofisina karreta no motór, soru tais, rentál fotokopia, sablon, no negósiu padaria, produsaun batako no servisu eletróniku.
“Ita nia grupu hamutuk 67 mak aprezenta prosposta, maibé grupu 44 mak hetan selesaun hodi simu fundu husi SEFOPE”, nia afirma.
Kritériu hetan fundu ne’e, nia dehan joven sira ne’e tenke hetan ona formasaun no partisipa ona iha negósiu ka investimentu inisiál.
“Kada tinan iha joven rihun ba rihun hetan graduasaun, maibé merkadu traballu laiha, entaun programa apoiu ida ne’e fó oportunidade ba joven sira atu bele kria rasik empregu,” nia afirma.
Nune’e, Governante ne’e husu ba grupu auto-empregu sira hodi jere di’ak orsamentu atubele hetan susesu iha sira nia investimentu.
“Tenke hatene oinsá produs relatóriu anuál no jestaun ba despeza no reseita ba iha investimentu. Ita tenke halo kalkulasaun ba osan hira mak sai no tama loron-loron”, nia sujere.
Iha fatin hanesan, Benefisiriu iha área ortikultura, Eliseu Martins, agradese ba SEFOPE tana bele fó apoia ba sira nia grupu. Tanba grupu ne’e hahú ho ema na’in-lima, hodi hala’o investimentu kuda modo iha 2012.
“Ami nia atividade mak kuda modo no tomate iha munisípiu Ermera. Ami hetan fundu hamutuk $9,332.00”, nia afirma.
Jornalista: Jesuína Xavier
Editór : Florencio Miranda Ximenes
