UNFPA husu média atu divulga notísa HIV/SIDA ho loloos ba públiku
DILI, 23 novembru 2023 (TATOLI) – Fundu Populasaun Nasaun Unida (UNFPA) hala’o diálogu ho media nasionál ho husu atu públika informasaun sira ho loloos, relasiona ho kazu HIV-SIDA iha Timor-Leste.
Tuir Enkaregada Interina UNFPA iha Timor-Leste, Pamela Aine, informa diálogu ida-ne’e atu papel media fó sai informasaun ba públiku tenke ho loloos, labele fó sai informasaun ne’ebé la los hodi diskrimina ema ho moris HIV/SIDA.
“Diálogu ida-ne’e atu tulun ita boot sira media atu fó sai informasaun ho loloos ba populasaun hodi tulun sira moris iha pás no estabilidade, la iha estigmasaun entre ema ho moris HIV/SIDA”, Pamela Aine, dehan bainhira hala’o diálogu ho media nasionál sira iha Salaun Ana Lemos UN-Compound Caicoli, ohin.
Iha fatin hanesan, Prezidente Asosiasaun Jornalista iha Timor Leste Zevonia Viera, dehan UNFPA asina ona akordu ho AJTL atu koopera ba malu hodi fó formasaun ba jornalista sira hodi hasa’e sira nia koñesimentu kona-ba área saúde nian.
“Ohin loron UNFPA kontinua fó hanoin ba jornalista katak ita-nia kobertura kona-ba saúde ne’e importante tebes tanba númeru feto ne’ebé afeta no vuneravel iha situasaun no kondisaun saúde iha ita-nia rain ho persentajen aas ne’ebé hasoru risku boot, entaun jornalista sira-nia servisu oinsá halo advokasia atu hasa’e koñesimentu komunidade nian ba moras HIV/SIDA hodi bele redús moras sira ne’e iha sira-nia moris”, Zevonia esplika.
Tanba ne’e, nia husu atu sosializa informasaun no halo kobertura ne’ebé mak edukativu atu nune’e komunidade sira bele komprende asuntu sira oinsá bele kontra estigmasaun ba ema sira ne’ebé mak moris ho HIV SIDA.
Iha sorin seluk, Prezidente Institutu Nasionál kombate HIV/SIDA (INCSIDA, IP), Daniel Marçal, hateten husi fulan Juñu 2003 to’o Juñu 2023, INCSIDA rejista kazu pozitivu HIV/SIDA iha Timor-Leste hamutuk 2002.
“Husi fulan Juñu 2003 to’o Juñu 2023 INCSIDA hamutuk ho Ministériu Saúde rejista ona kazu pozitivu HIV/SIDA hamutuk 2002, husi númeru ne’e iha ema na’in 10.65 mak hetan tratamentu ativu, no ema na’in 200 mate ona no ema na’in 577 mak lakon tratamentu,” nia konklui.
Jornalista : Felicidade Ximenes
Editór : Zezito Silva
