Xanana toka asuntu juventude iha forúm Internasionál Business
DILI, 23 novembru 2023 (TATOLI) – Primeiru-Ministru, Kay Rala Xanana Gusmão, toka asuntu juventude iha forúm Internasionál Business ne’ebé realiza iha Timor-Leste.
“Joven sira ne’ebé hakarak tebes hetan oportunidade iha dezenvolvimentu atu sira bele transforma sira-nia aan no mós transforma nasaun tanba ita asiste mudansa sosiál no teknolojia, ne’ebé akontese ho velosidade impresionante (katak lais la halimar, halo ita hakfodak) lori de’it fulan ka semana”, Xanana hateten bainhira partisipa iha forúm ne’ebé realiza iha Bebora, ohin.
Xanana husu ba emprezáriu sira liuliu hirak ne’ebé joven tenke adapta aan ba mudansa ne’e, no tenke kria modelu negósiu modernu no inovadór sira ne’ebé joven iha liu kapasidade atu halo mudansa.
“Tanba ne’e mak ita tenke fiar liu iha ita-nia juventude, ita tenke kria oportunidade ba joven sira, liuliu iha setór produtivu nasionál”, lider nasionál ne’e afirma.
“To’o ona tempu atu ita lansa startups iha Timor-Leste, estratejia ne’ebé ema hotu koñese iha mundu tomak, ba joven sira ne’ebé buka dezafiu ho oportunidade. Joven sira tenke hola inisiativa no Governu sei apoiu empreza lokál sira atu arranka ka dezenvolve, hanesan buat ne’ebé prevee tiha ona iha Polítika Nasionál kona-ba Indústria ne’ebé Governu prepara daudaun”, nia friza.
Situa iha Sudeste Asiático, maibé besik Austrália ho Pasífiku, Timor-Leste bele usufrui (ka aproveita) dinámika ekonómika ne’ebé vibrante (ka maka’as) tebetebes iha rejiaun ne’ebé Timor-Leste hola parte ba.
“ASEAN foin daudaun ne’e mosu hanesan motor desizivu ida iha ekonomia globál. Ho merkadu ida ho 2,3 milhares de milhões de dólares no 600 milhões de pessoas, ASEAN hanesan poténsia ekonómika ida ne’ebé transforma Sudeste Asiátiku. Razaun ida tanba sá Timor-Leste servisu maka’as ba adezaun iha ASEAN mak atu hola parte iha istória susesu boot ne’e”, nia relata.
Nia hatutan, adezaun plena (ka total) iha ASEAN sei fó ba empreza no ba investór estranjeiru sira konfiansa ho seguransa atu investe iha Timor-Leste.
“Husi sorin seluk, ita iha mós lasu profundu (ka kle’an) ne’ebé une (ka liga) ita ho nasaun sira husi fatin barabarak iha globu, no joven timoroan sira bele adapta aan kulturalmente, no bele mós linguistikamente, ho mundu sira seluk. Ne’e la’ós de’it vantajen boot ida, maibé mós oportunidade ida hotu atu aproveita potensiál inovativu husi ekonomia dezenvolvida ka emerjente sira ne’ebé namkari iha mundo tomak”, nia hatutan.
Ho nune’e, mak nia konsidera katak empreza Timor-Leste sira tenke aproveita oportunidade hirak ne’ebé iha atu dezenvolve nasaun ne’e.
“Ita hamriik metin nafatin, la’ós de’it tanba Rezisténsia Timorense, maibé mós tanba fundamentu kooperasaun no solidariedade ne’ebé ho valór boot tebetebes. Kooperasaun ho solidariedade internasionál no kooperasaun ho solidariedade entre timoroan sira”, nia konklui.
Jornalista: Hortencio Sanchez
Editór : Zezito Silva
