DILI, 24 novembru 2023 (TATOLI)–Embaixadór Timor-Leste ba Brunei Darrusalam, Abél Guterres ho nia delegasaun, kinta ne’e, hala’o enkontru ho Ministru Administrasaun Estatál, Tomás Cabral, hodi diskute kona investimentu ligadu ho peska, turizmu, área propriedade dezenvolvimentu iha munisípiu Ataúro, Dili no Baucau.
“Ohin, ami ko’alia kona-ba investimentu iha área peska, turizmu, área propriedade dezenvolvimentu hanesan master plan iha Baucau, Dili, no iha Ataúro mós. Ami mai ko’alia ida-ne’e ho ideia sira-ne’e oinsá mak bele hahú. Espera katak ita-nia investimentu ne’e la’o di’ak,” Embaixadór Timor-Leste ba Brunei Darusalam ne’e hateten ba Agência Tatoli, iha gabinete MAE, Colmera.
Ligadu ho investimentu, nia dehan, hanesan fórum bussiness Internasionál ne’ebé ohin realiza ne’e di’ak tebes tanba bainaka rai-liur barak mak partisipa inklui Brunei Darrusalam.
“Ohin, ko’alia ne’e atu oinsá osan ne’e tama mai hodi fó servisu ba ema. Maibé, ema mai atu investe ne’e presiza tau hanoin hamutuk no halo akordu, nune’e investimentu ne’e bele la’o ho di’ak. Sira-ne’e mai dala hitu ona no sira halo ona estudu no sasán sira-ne’e atu la’o oinsá, sira halo hotu ona. Maibé presiza halo tan estudu hodi konkretiza planu sira-ne’e, hodi nune’e bele la’o ona. Mai dala hitu ona ne’e presiza halo akordu nune’e implementa lalais ona,” nia hateten.
Diplomata ne’e esplika, momentu ne’ebá Prezidente Repúblika, José Ramos Horta, ba vizita Brunei Darrusalam no bussines man hosi Brunei hamutuk 200 mak ba Prezidente nia fatin hodi ko’alia kona-ba asuntu ne’e, sira hakarak rona no interresadu atu mai Timor-Leste.
“Nune’e, kuandu interresadu ona, oinsá mak atu simu ema ne’e presiza halo di’ak, entaun ami mak esforsu no dalan hodi sira mai investimentu servisu sira iha Timor,” nia hateten.
Kona-ba Ataúro, nia dehan, ne’e planu ahi halo solar tanba Ataúro zona sensitivu atu halo konservasaun ba ambiente tanba iha ne’ebá rikusoin barak no ida-ne’e sai osan-mean ba Ataúro-oan sira.
Jornalista : Osória Marques
Editór : Cancio Ximenes
