DILI, 24 novembru 2023 (TATOLI) – Embaixadora Portugal iha Timor-Leste, Manuela Bairos fó prémiu ba vensedor ka mánan-na’in ba artezanatu sanan rai hanesan primeiru lugar ho osan $500, segundu lugar ho $300 no $200 ba vensedór terseiru lugar ba produtu sanan rai ho dezenu artístiku.
“Objetivu husi konkursu ne’e atu promove produtu tradisaun Timor-Leste, tanba sanan-rai hanesan mós kriatividade husi tradisaun timoroan. Tanba TimorLeste iha tradisaun Tais, homan sestu, sanan rai no seluk tan. Traballu ida hanesan ezije kriatividade, diskusaun no téknika ne’ebé uza”, Embaixadora ne’e hatete ba Agência TATOLI, iha Sentru Kulturál Jorge Sampaio.
Manán na’in dahuluk mak Eskola Sentru Aprendizajen no Formasaun Eskolar (CAFE, sigla Portugés) Aileu ho produtu sanan-rai hanaran Picasso de Pernas pro ar, segudu lugar husi Liquiça ho naran produtu mak meu Timor no terseiru lugar mak produtu Do fogo a terra husi CAFE Lospalos.Manan sira selesiona husi juri koletivu husi Arte Moris, sentru kulturál Embaixada Portugal nian husi konkorente sira kompostu husi grupu hamutuk 22 husi eskola CAFE Aileu, Likisá, Lospalos, Maliana, Manatutu no ema individu sira.
Embaixadora ne’e hatutan produtu artezanatu ne’e sai expozisaun ba vizitante sira to’o loron 15 fulan dezembru.
Iha fatin hanesan, Professora Escola CAFE Aileu, Ana Rosa Morais, afirma projetu ne’e dezenvolve husi ideia estudante 61 iha sala aula pre-eskolar no konsege okupa primeiru lugar.
“Labarik sira fó ideia tau mortel, papél iha lian portugés signifika uniaun, seluk husu ain ba leten, entaun ami tau naran Picasso de pernas p´ro ar. Sira hakarak tau matan, feto tur hodi fó lian, tanba Timor menus lian husi feto”, nia afirma.
Entretantu, Maria Imaculada hanesan mós individu iha ne’ebé iha kreatividade sanan rai ho artezanatu hodi aprezenta mudansa klimátika ne’ebé hetan mos rekonesimentu husi Embaixadora.
“Ha’u dezeñu sanan rai inspirasaun husi natureza, oinsá mak ema nia haree ba rai maran, bee laiha, ai-horis maran loron matan atu aprezenta mudansa klimátika”, nia afirma.
Jornalista: Jesuína Xavier
Editór : Florencio Miranda Ximenes
