DILI, 24 novembru 2023 (TATOLI) – Empreza hosi nasaun Xina ho naran Unilumin Group Co. LTD interesante atu investe iha Timor-Leste (TL) iha área rekursu naturál.
“Timor-Leste nia fatin furak tebes, rekursu naturál presiza dezenvolve, ami prontu atu investe iha rekursu naturál maibé ita sei ko’alia uluk ho Governu atu nune’e ita iha akordu ruma mak ami foin bele halo investimentu”, Diretora Ezekutiva Unilumin Group Wu Sha ba Agência TATOLI iha Bebora, ohin.
Nia dehan, Timor-Leste nia rekursu naturál mak dezenvolve di’ak ona mak sei fó garantia ba ekonomia rai laran.
“Ami haree investór internasionál barak hakarak investe iha mina no gás no seluk tan, ami fiar Timor-Leste sei iha mudansa ba ekonomia ne’ebé signifikativu”, Wu Sha hateten.
Bainhira fila hosi Forum Internasionál Business, nia parte sei relata ba Diretór Board Kompaña nian atu foti desizaun bele mai halo akordu ho Timor-Leste ka la’e kona-ba oinsa halo investimentu iha rekursu naturál nian.
Jornalista: Hortencio Sanchez
Editór : Zezito Silva
