BAUCAU, 24 novembru 2023 (TATOLI) – Progresu projetu reabilitasaun estrada rurál diresaun postu Vemasse hosi Caicua to’o suku Ossouala foin atinje pursentu 73.
Diretór Serbisu Munisipál Obras Publiku Baucau, Pedro Alexandre Guterres Perreira, esplika, projetu refere hahu asina kontratu iha loron-30 fulan agostu tinan-2021 ho duransaun kontratu tinan-ida, ne’ebé kompañia Chacailala Unipesóal.lda mak sai manán-na’in maibé to’o agora seidauk finaliza tanba kapasidade finanseira.
“Ita fó nafatin estensaun tanba ministériu hakarak projetu sira-ne’ebé 2020 ba leten konsidera tenke finaliza tanba área rurál ita-nia komunidade konsentra hotu iha ne’ebá entaun nafatin fó prioridade,” Diretór Serbisu Munisipál Obras Publiku Baucau hateten iha Vila Nova, sesta ne’e.
Maske nune’e, Obra Públika Baucau kontinua monitoriza no fó atensaun ba kompañia responsável atu sériu implementa projetu refere tanba komunidade barak asesu hodi transporta produtu lokál ba merkadu.
Projetu refere ho tipu reabilitasaun ho distánsia kilómetru 21.6 ho valór orsamentu $242.001,57 ne’ebé tuir kontratu finaliza iha fulan-agostu tinan-2022, maibé realidade foin atinje pursentu 73.
“Ita bolu nafatin to’o halo supervizaun maibé difikuldade kompañia hato’o falta orsamentu, mesmu halo ona pagamentu balun,” Pedro Guterres akresenta.
Obra Públika Baucau konsidera kompañia responsável implementa projetu lentu nune’e nu’udar Baucau oan husu kompañia lokál sira atu serbisu tuir regra inklui rona instrusaun hosi tékniku sira hodi implementa tuir nune’e bele finaliza ba komunidade nia interese.
Tuir Pedro Guterres, governu kontinua fó prioridade ba kompañia lokál atu dezenvolve aan liuhosi kapasitasaun nune’e futuru kontinua hetan konfiansa hosi obras publiku ligadu ho projetu reabilitasaun projetu estrada rurál iha munisípiu Baucau.
Jornalista : Natalino Belo
Editór : Evaristo Soares Martins
