Joven sira presiza banati espíritu luta-na’in hametin nasionalizmu no patriotizmu
DILI, 23 novembru 2023 (TATOLI)—Vise Prezidente bankada CNRT iha Parlamentu Nasionál (PN), Deputadu Patrocínio Fernandes dos Reis, husu joven sira presiza banati espíritu luta-na’in no erói sira-nian hodi hametin nasionalizmu no patriotizmu, liuliu oinsá hamutuk harii pás no unidade kontribui ba dezenvolvimentu nasionál.
Nia hateten, iha komemorasaun loron proklamasaun unilaterál 28 novembru ne’e hanesan momentu istóriku ida-ne’ebé fanu ema hotu-hotu nia espíritu nasionalizmu no patriotizmu luta ba Timor-Leste nia ukun rasik aan.
“Loron proklamasaun ida-ne’e mak provoka hodi halibur timoroan hotu-hotu hamutuk harii unidade nasionál, to’o ikus mai bolu nasionalizmu hodi luta to’o hetan ukun rasik aan. Hanoin ema ida-idak tenke hateke ba loron istóriku sira-ne’e, nune’e buka halo nusa nu’udar sidadaun kontribui ba harii pás no unidade,” Vise Prezidente bankada CNRT ne’e hateten ba Agência Tatoli relasiona ho Timor-Leste sei komemora loron Proklamasaun Independénsia Unilaterál 28 novembru ba dala-48 ne’ebé ba tinan ne’e ho tema ‘Celebrar a história e construer o futuro’ iha fukun PN, sesta ne’e.
Ohin loron, la’ós kestaun patriotizmu no nasionalizmu maibé presiza ema-nia konsiénsia nu’udar sidadaun atu oinsá espirítu ida nasionalizmu no patriotizmu ne’ebé jerasaun tuan sira kuda hela, hodi lori ba faze naruk ida independénsia ne’e tenke kuda metin iha timoroan ida-idak nia fuan laran.
“Ohin loron tama ona ba independénsia nia laran, tenke iha konsiénsia ida atu hametin espirítu ida nasionalizmu no patriotizmu. Atu nune’e, ema bele buka partisipa ativa iha prosesu hotu-hotu ba dezenvolvimentu nasionál, bele atinje objetivu harii Estadu no nasaun tuir buat ne’ebé ita-nia luta-na’in no erói sira tau nu’udar misaun boot ba rezisténsia hodi luta ba libertasaun,” nia dehan.
Deputadu bankada Governu ne’e hateten, responsabilidade atu eduka ema hotu ne’e responsabilidade ema tomak nian nu’udar sidadaun, sosiedade hotu-hotu hodi haree ba istória rezisténsia ema barak mate ba ukun rasik aan.
Ema hotu-hotu iha nia konsiénsia atu luta ba independénsia ne’e la fásil, tanba jerasaun ida ba kotuk sakrífika sira-nia vida hodi liberta rai Timor-Leste to’o ohin loron ema sira-ne’ebé sei moris buka atu sakrifíka enérjia ka tempu ba dedikasaun hodi bele konstribui ba dezenvolvimentu nasaun nian.
Agora responsabilidade atu eduka, nia dehan, Estadu iha responsabilidade maibé mós sidadaun tomak iha dever kontribui hametin pás no harii unidade, atu fó bibán ba Estadu hala’o dezenvolvimentu iha trankuilidade nia laran hodi fó resposta ba preokupasaun sosiedade tomak ninian kona-ba objetivu ba ukun ne’e rasik.
Vise Prezidente bankada KHUNTO, Deputadu António Verdiál de Sousa, hateten atu proklama loron proklamasaun independénsia unilaterál iha 28 novembru 1975 ne’e dahuluk nu’udar timoroan tenke hatene no kompreende lala’ok ne’ebé lideransa anteriór sira hala’o.
“Espesialamente ba ita-nia avó Francisco Xavier do Amarál ho Nicolau Lobato no sira seluk tan, ida-ne’e importante no ita tenke fó rekoñesimentu ida-ne’ebé kle’an hodi agradese ho esforsu ne’ebé hala’o to’o rezultadu nasaun to’o hetan ukun rasik aan,” nia hateten.
Haree ba situasaun ohin loron, tuir nia, joven sira presiza banati tuir luta-na’in no erói sira-nia nasionalizmu no patriotizmu hodi eskola no estuda makaas atu kontribui ba dezenvolvimentu nasionál.
“Edukasaun sívika ne’e importante tebes. Edukasaun sívika ne’e la’ós ita husu de’it ba Governu mak halo esforsu fó edukasaun sívika, kampaña no sensibilizasaun. Maibé, inan no aman atu eduka nia oan sira-ne’ebé sai di’ak iha sosiedade nia leet, hodi kontribui ba dezenvolvimentu nasaun liuhosi ita-nia dever hanesan sidadaun,” nia dehan.
Deputadu hosi bankada opozisaun ne’e mós husu ukun-na’in sira iha órgaun soberania sira tenke hamutuk hodi halo investimentu di’ak, kria kondisaun no prepara juventude sira hodi lidera nasaun iha futuru.
Jornalista : Nelson de Sousa
Editór : Cancio Ximenes
