Joven sira presiza hatutan istória 28 Novembru
BOBONARO, 24 novembru 2023 (TATOLI) – Vise Prezidente Konselu Veteranu Munisípiu Bobonaro, Lúcio Diniz Marqués ‘Onsar’ apela ba joven sira atu hatutan loron istóriku 28 novembru 1975 tanba loron ne’e mak timoroan sira proklama independénsia Timor-Leste hosi okupasaun Indonézia.
Nia hato’o apelu ne’e liga ba selebrasaun loron 28 novembru ba dala-48 iha tinan ne’e ho tema ‘selebra istoria no harii futuru’.
“Joven sira atu konta nafatin istória ne’e ho ida-ne’e mak ita hotu ukun rasik-aan, sé karik ita hotu-hotu la esforsa-aan, ita-nia maun-boot sira, Nicolau Lobato, Francisco Xavier Amaral, Mari Alkatiri, Xanana, Ramos Horta, sira ne’e sei idade natoon kuaze 30 e tál. Ami momentu ne’e idade 20, ami esforsu kaer kilat, luta kontra inimigu, ida ne’e istória boot ba ita, liuliu ba joven sira atu kontinua konta tutan istoria ne’e,” nia fó hanoin ba joven sira.
Tuir nia, istória ne’e hakerek ho raan no ruin ne’ebé mai hosi ema kuaze na’in rihun 300-resin ne’ebé dedika sira nia-aan mate ba ukun rasik-aan.
“Juventude tenke banati tuir, veteranu, kombatente sira-nia hahalok, halo tuir ba buat-ne’ebé veteranu sira hatudu, sé mak lakohi halo tuir porque nia ladún interese ba nasaun ida-ne’e” nia hateten.
“Selebrasaun ne’e iha preparasaun Indonézía atu invade Timor-Leste (iha momentu ne’ebá), maibé ho aten barani joven sira, komandante sira fó apoia ba malu, selebra duni loron ne’e, momentu ne’e ha’u iha kompañia Bobonaro ona, ami asiste udan-boot tebes, dehan katak ita sei fakar raan mak hetan independénsia, ne’ebé ita dignifika loron boot ba nasaun ida,” nia afirma.
Tuir nia, ida ne’e hatudu ba joven sira atu ho sira-nia hanoin no hakarak atu eskola, estuda nune’e istória ne’e bele konta nafatin jerasaun ba jerasaunn.
“La’ós maluk balu dehan ita labele konta tán istoria ona, tanba nasaun ida ukun-aan tenke ho nia istória, nia istória mak ne’e 28 novembru proklama independénsia depois Indonézia tama fronteira iha 16 outubru 1975, depois ida-ne’e komesa tama hosi Liquiçá ba Maubara, iha 07 dezembru invade Dili. Ida-ne’e loron boot atu hatudu ba ita, mate ka moris ukun rasik-aan,” nia relembra.
Nune’e, nia husu ba joven sira atu sunu lilin no kari-aifunan ba eroi sira-ne’ebé sakrifika sira-nia aan mate ba libertasaun nasionál.
Tánba ne’e,Adjuntu Prezidente CCLN Munisípiu Bobonaro,husu ba joven sira atu partisipa masimu iha selebrasaun loron istoriku ne’e,núne’e fó imonajen ba erois sira,no bele hatene istoria lolos hosi prosesu luta ba libertasaun nasionál.
Jornalista: Sérgio da Cruz
Editór: Evaristo Soares Martins
