DILI, 26 novembru 2023 (TATOLI) – Prezidente Repúblika (PR), José Manuel Ramos Horta, sei kondekora profesór na’in-90. Serimónia ne’e sei realiza iha loron 27 Novembru, iha Palásiu Prezidensiál, Bairru-Pité, Dili.
Xefe Estadu hato’o proposta ba Ministériu Edukasaun atu identifika profesór sira-ne’ebé hanorin dezde tempu portugés, indonézia no iha tempu ukun rasik-aan. Nune’e Ministériu Edukasaun konsege identifika profesór na’in-90. Maibé ba manorin-na’in ne’ebé tama ona identidade reforma.
Diretora Jerál Polítika Planeamentu no Inkluzaun hosi Ministériu Edukasaun, Odília das Dores Martins, informa ministériu rasik antes ne’e simu proposta Prezidente Repúblika nian bodi buka rekolla dadus profesór ne’ebé hanorin iha era tolu hamutuk 100-resin atu submete ba Palásiu Prezidensiál hodi hetan rekoñesimentu hosi estadu.
“Ami halo duni esforsu hodi identifika profesór sira -ne’ebé hanorin iha era tolu tuir Prezidente Repúblika nia hakarak, maibé ami la konsege rekolla hotu. Ami hetan de’it profesór na’in-90 maka aban sei hetan uluk kondekorasaun depois sei iha tempu tuir mai ami bele prepara liután,” Odília ba Tatoli liuhosi telefónika, domingu ne’e.
Nia dehan, profesór na’in-90 ne’ebé hanorin iha era tolu ne’e balun reforma ona, balun mós to’o agora sei ativu hela mezmu sira-nia idade balun iha ona 70 mai to’o 80 maibé kontinua hanorin nafatin.
Tanba ne’e estadu hakarak kondekora sira nu’udar konsiderasaun ida ba sira-nia dedikasaun tomak iha prosesu konstrusaun hodi forma rekursu umanu sira.
Tuir nia, proposa Prezidente Repúblika nian ne’e pertinente tebes. Tanba durante ne’e estadu sempre fó kondekorasaun kada tinan ba parte seluk de’it maibé haluha tiha dedikasaun profesór sira.
“Agora ba ita-nia profesór na’in-90 ne’ebé hetan ona konfirmasaun ne’e aban 27 novembru, dadeer iha Palásiu Prezidensiál sei iha serimónia ba sira. Depois sei iha tempu tuir maka maka ita sei halo nafatin esforsu hodi kontinua identifika tán profesór ne’ebé hanorin iha era tolu ne’e hodi kontinua aprezenta lista ba Palásiu Prezidénsial hodi hein fali desizaun husi Prezidente da Repúblika,” tenik nia.
Jornalista: Tomé Amado
Editór: Evaristo Soares Martins
