Deputada PD husu Bombeiru tesi ai-hun boot ne’ebé fó risku

DILI, 27 novembru (TATOLI)—Deputada hosi bankada PD iha Parlamentu Nasionál (PN), Sancha Tilman, husu parte Bombeiru atu tesi ai-hun boot ne’ebé bele fó risku ba ema iha tempu udan hodi hamosu dezastre.
Nia hateten, iha semana hirak liuba udan monu bosok uituan de’it rezulta ai-hun tohar hodi monu hanehan karreta rua iha Kafé Brazíl nia oin.
“Ita haree ai-hun iha Dili laran liuliu iha edifísiu Parlamentu, BCTL, G7+ nia oin no igreja Motael nian ne’e, ai-hun hirak ne’ebé kondisaun balun ladún di’ak latan tesik ba-mai. Ezemplu, iha edifísiu Parlamentu nia oin, ita labele hein beibeik to’o nia tohar mak ita hakfodak. Entaun, husu ba Governu atu bele haree kona-ba situasaun hirak ne’e iha Dili laran,” nia hato’o liuhosi reuniaun plenária PN, segunda ne’e.
Tanba ne’e, presiza halo prevensaun seguransa da vida ba sidadaun sira hala’o movimentu sente seguru liuliu iha tempu udan.
Iha parte seluk, nia hato’o mós ba Ministéiru Saúde haree situasaun tama ona ba tempu udan daudaun ne’e susuk komesa mosu iha fatin-fatin, nune’e presiza ativa fali atividade fumigasaun susuk hodi prevene moras malária.
Jornalista : Nelson de Sousa
Editór : Cancio Ximenes

