BOBONARO, 27 novembru 2023 (TATOLI)- Prezidente Repúblika (PR), José Manuel Ramos Horta, segunda ne’e atribui medalla kondekorasaun orden Nicolau Lobato no orden Funu-Nai’n ba kombatente na’in-201 iha munisípiu Bobonaro ne’ebé rezita iha tinan 2003 no 2005.
Kondekorasaun ho grau (3) atribui ofisialmente hosi Reprezentante Konselu Kombatente Libertasaun Nasionál, Munisípiu Bobonaro, Jacinto Viegas ‘Roque’, bazea ba dekretu Prezidensia Repúblika númeru 103/2023.
Jacinto Viegas ‘Roque’ , hateten, kondekorasaun ne’e nu’udar símbolu rekoñesimentu no valorizasaun hosi estadu Timor-Leste ba kombatente no mártir sira-ne’ebé dedika sira nia-an luta ba libertasaun nasionál hahú iha 1975 to’o 1999.
“Sira fó sira-nia vida tomak salva nasaun ida-ne’e hosi inimigu sira-nia le’t, ne’ebé hau hameno ba ita-boot sira maka ne’e, istória ne’e istória nafatin, kontinua fó sai ba públiku nos mos imi-nia oan no bei-oan sira, atu núne’e istoria sira-ne’ebé imi halo labele kotu bainhira imi mate, kuandu imi la habelar ba oan sira, aban sira mate istória ne’e sei kotu,” nia informa ba jornalista sira iha Jináziu Maliana.
Eis sekretáriu Organizasaun Mulher Timor (OMT), Jacinta Abu-Cau Pereira, sente orgulu no agradese ba estadu Timor-Leste tanba bele valoriza sira-nia kontribuisaun natoon ne’ebé dedika ba nasaun ne’e.
“Hanesan timoroan, ami kontribui tuir ami-nia tempu, ida-ne’e hansean parte Ki’ik ida-ne’ebé ami kontribui liu tiha ona, maibé ho idade ne’ebé sei produtivu, ami sei kontinua haka’as-an atu kobtribui tan ba dezembolve rai ida-ne’e ho profissaun saida deit ba ita-nia rai atubele hadi’a povu nia morís,” nia dehan.
Cândido Maia nu’udar família mártir, konsidera medalla ne’e hatudu katak estadu dignifika valór no prinsípiu ba luta libertasaun nasionál.
“Ohin hanesan família ida, maski ita nia avo sira laiha ona,maibé estádu kondekora,ne’e hansan orgulu ida,hanesan sidadaun ida ne’e hola parte ba ita nia estádu no nnasaun,ita sentí previleizu,wainhira hetan konfiansa hosi estádu ba ita nia Funu-Nain ba libertasaun nasionál”Candido Tenik
Cándido akresenta hanesan jerasaun rezistensia nia promete sei kontinua hatutan hakbit nafatin valores no prinsipiu ne’ebé Funu-nain sira hatudu ona prosessu luta ba libertasaun nasionál.
“Hanesan sidadaun ita nafatin orgullu iha prosesu tomak, agora oinsá haree prosesu dezenvolvimentu ba oin,” nia katak.
Jornalista: Sergio da Cruz
Editór: Evaristo Soares Martins