DILI, 27 novembru 2023 (TATOLI) – Sentru Formasaun Fundasaun Hadomi Timor (FHT), hahú iha tinan 2021 to’o agora, konsege fó ona formasaun lian Koreia ba timoroan na’in-700, husi númeru ne’e ema besik 100 mak serbisu ona iha Koreia.
“Ami loke kursu lian Koreia hahú iha 2021. Ami koopera ho Sekretáriu Estadu Formasaun Profisionál no Empregu, iha tinan kotuk, entaun ema besik atus ida mak bá serbisu ona iha Koreia husi totál ema 700. Balun sei iha prosesu tuir teste”, Diretór Ezekutivu FHT, Abrão Monteiro, hatete ba Agência TATOLI iha Farol-Dili.
Daudaun ne’e, nia informa formadu na’in-80 mak finaliza ona formasaun no tuir ona teste vaga kandidatura traballadór bá Koreia Súl.
“Ami koopera ho SEFOPE, entaun lori sira ba tuir teste ba vaga. Sira konkorre vaga ne’e liu mak ba serbisu”, nia afirma.
FHT iha sentru formasaun hanesan Komoro, Farol, Caicoli, Bidau no Becora. Iha tipu kursu hanesan Administrasaun, lian Inglés, Portugés ho lian Koreia no Infomátika Teknolojia.
Formasaun lian Koreia ne’e ho durasaun tolu to’o ne’en ba formandu sira bele tuir iha sentru formasaun iha Becora. Kada fulan formadu sira selu $15 to’o $25 ba kada área kursu hodi bele selu ba formadór.
Jornalista : Jesuína Xavier
Editór : Florencio Miranda Ximenes
