DILI, 27 novembru 2023 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten presiza halo reflesaun ba funu naruk no ba eroi sira-nia mate mak ema hotu sei iha sentimentu nasionalizmu.
Nia hateten, eroi sira-ne’e mak fundadór prosesu hahú ohin ita komemora tinan-48, ne’ebé timoroan sira-ne’ebé sei moris labele haluha ida-ne’e maibé ida-ne’e sai hanesan memória ida, atu ema hotu halo reflesaun.
“Ita hotu halo reflesaun ba funu ne’ebé naruk, ema barak mak mate, atu nune’e ema hotu sei iha sentidu responsabilidade no sentimentu nasionalizmu. Ida-idak halo reflesaun hodi haluha tiha kakutak mukit ne’ebé gosta kria problema ba rai ida-ne’e. Se eroi sira prontu fó aan ba mate ba rai ida-ne’e, hodi sosa indenpendénsia, ohin loron, ita tenke baku malu tuku malu, tanba buat laek ida. Ne’ebé, ha’u hanoin mensajen ida-ne’e ba Timor oan hotu, tanba nasaun ida atu hetan ukun aan mai hosi prosesu ne’ebé naruk,” Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten liuhosi komunikadu relasiona ho Timor-Leste komemora loron proklamasaun independénsia 28 Novembru ba dala-48 (28 novembru 1975-28 novembru 2023) ho tema “Celebrar a História e Construir o Futuro”, ne’ebé Agência Tatoli asesu, segunda ne’e.
Sentidu hosi selebrasau ohin atu fanu timoroan hotu hodi hanoin hikas momentu istóriku tinan 48 liubá, sira deklara Timor-Leste proklama Independénsia unilateralmente.
Pároku Nossa Senhora de Fátima Ainaro, Alberty Franco Morato, hateten tanba sira-nia mate mak ohin loron Timor-Leste hetan nia Liberdade, nune’e husu Timor oan hotu atu hanoin hikas momentu istóriku hirak ne’e, tanba liuhosi prosesu sira-ne’e mak ohin harii nasaun RDTL.
“Nasaun RDTL harii hosi sira-nia ruin no raan nia leten. Ita hotu tenke valoriza sira-nia luta tinan 48 liubá sira hamriik iha filleira ida, hodi temi mate ka moris ukun rasik aan,” amu ne’e hateten. amu dehan.
Nia hateten, rroi éroi sira sakrifika sira-nia aan ba mate tanba hakarak Timor hetan ukun rasik aan.
Hafoin misa kontinua kedas kari ai-funan, sunu lilin iha osuáriu no kari aifunan iha krús boot Jakarta II, hodi hanoin hikas saudozu sira-ne’ebé mak mate tanba hetan oho hosi militár Indonéziu sira.
Hafoin misa amu pároku hamutuk ho sarani, Administradór Munisípiu Ainaro Leovigildo Amaral Pereira, Komandante PNTL Munisípiu Ainaro Superintendente Polisía Paulino Carmo Pereira. Prezidente Konsellu Kombatente Libertasaun Nasionál Júlio Nascimento “Loro Mesak”, kargu xefia sira iha Administrasaun Munisípiu, veteranu kontinua kari ai-funan iha Osoáriu hodi fó omenajen ba saudozu sira.
Jornalista : Osória Marques
Editór : Cancio Ximenes
