iklan

EDUKASAUN, HEADLINE

KNPTL protesta Edukasaun kona-ba rejime espesiál ne’ebé esklui profesór kontratadu 2023

KNPTL protesta Edukasaun kona-ba rejime espesiál ne’ebé esklui profesór kontratadu 2023

KNPTL halo konferénsia imprensa iha Jardín 05 de Maio. Imajen/Afonso do Rosário.

DILI, 27 novembru 2023 (TATOLI) – Konsellu Nasionál Profesór Timor-Leste (KNPTL) halo asaun protesta hasoru Ministériu Edukasaun (ME) kona-ba rejime espesiál ba profesór kontratadu sira tanba konsidera halo diskriminasaun ba kontratadu sira iha abríl 2023 ne’ebé latama iha ingresu espesiál ne’e.

Asaun protesta ne’e halo tanba ministériu fó sai ona katak sei lahalo ingresu automátiku ba manorin kontratadu iha abríl tinan kotuk nian tanba Lei Funsaun Públika la autoriza.

Portavós KNPTL, Celestino Júlio Belo, hateten sira la satisfás ho desizaun Ministériu Edukasaun kona-ba rejime espesiál ba profesór kontratadu no esklui tiha profesór sira ne’ebé maka asina ona kontratu iha fulan-abríl.

“Ami halo asaun protesta ne’e relasiona ho profesór kontratadu 2023 ne’ebé Ministériu Edukasaun la konsidera tama iha lista rejime espesiál tuir ami-nian interpretasaun ba Deretu-Lei númeru 31/2023, 31 maiu, primeira alterasaun ba Dekretu-Lei númeru 23/2010, 9 dezembru, kona-ba Estatutu Karreira Edukadores Infánsia no Profesór Ensinu Báziku no Sekundáriu”,  Celestino Belo hatete iha konferénsia imprensa ne’ebé hala’o iha jardín 5 de Maio Colmera, ohin.

Nia dehan interpretasaun lei ne’e la hanesan ME nian ne’ebé fo sai iha loron 14 novembru ne’ebé deside sei lahalo ingresu autimatikamente ba profesór 1.499 ne’ebé asina kontratu iha abríl 2023 tanba lei Funsaun Públika la autoriza no ME sei lahalo alterasaun ba Estatutu Karreira Dosente hodi simu manorin sira ne’ebé maka kontrata ona. Tanba iha dekretu-lei ne’e laiha artigu ida mak define rejime espesiál ba profesór kontratadu husi 2013 to’o 2022.

“Ami ne’e profesór no intelektuál. Ita presiza interpreta buat ruma tuir lei, se dekretu mak dehan iha ne’ebá sé profesór kontratadu ba rejime espesiál husi 2013 to’o 2022, ami prontu tuir, maibé kuandu iha lei la’ós hanesan ne’e, Ministériu Edukasaun labele interpreta tuir nia hakarak”, afirma.

Nia hatutan iha argumentu ne’ebé ME fó sai katak profesór kontratadu sira ne’ebé iha ona avaliasaun dezempeñu tinan rua ikus mak elijivel ba rejime espesiál ho nota mínimu bom (di’ak), maibé iha Dekretu-Lei ne’e iha artigu 38, númeru 1, la define profesór kontratadu husi 2013 to’o 2022 mak bele hetan avaliasaun dezempeñu, maibé iha lei ne’e dehan profesór hotu-hotu ne’ebé hala’o ona knaar iha eskola sei hetan avaliasaun dezempeñu mínimu fulan neen ba leten. Signifika, profesór kontratadu iha abríl 2023 ne’e prienxe ona rekezitu ida ne’e.

Tanba ne’e, tuir KNPTL ninia interpretasaun, Ministériu Edukasaun manipula dekretu-lei ida ne’e, entaun Konsellu ezije ida ne’e no haruka ona karta audiénsia ba Ministériu Edukasaun iha loron 14 novembru hodi buka solusaun ba problema sira ne’e, maibé to’o agora laiha resposta.

“Sé ezijénsia ida ne’e lahetan resposta ruma iha tempu badak, KNPTL promete katak profesór sira sei hakat bá Ministériu Edukasaun hodi husu responsabilidade administrativa ba parte sira ne’ebé reponsabiliza ba asuntu profesór kontratadu sira-nian”, realsa.

Portavós ne’e promete sei kontinua asume funsaun nu’udar profesór hodi hein to’o kontratu termina iha dezembru ne’e, tanba konsidera labarik sira mak futuru ba nasaun. “Sé ami abandona funsaun, labarik sira mak sai vítima, la’ós ministra edukasaun”, katak.

Iha sorin seluk, Diretora Rekursu Umanu Ministériu Edukasaun, Anita Tavares de Jesus, esplika katak profesór sira ne’ebé maka ministériu konsidera la elijivel ne’e tanba sira foin hetan kontratu iha abríl 2023 no laiha avaliasaun dezempeñu, tanba atu halo avaliasaun ne’e tuir kritéria halo iha tinan rua ikus signifika iha 2021 no 2022.

“Iha dekretu-lei ne’e la dehan rejime espesiál ne’e ba profesór sira husi 2013 to’o 2022, maibé iha kritériu ne’e hateten última avaliasaun dezempeñu ne’e iha 2021 ho 2022. Agora, sira ne’e foin halo kontratu iha 2023, entaun atu halo avaliasaun ba sira-nian dezempeñu ne’e halo oinsá. Maske profesór sira balun hanorin voluntáriu tinan barak maibé laiha kontratu. Ida ne’e mós la tama iha rejime espesiál”, tenik.

Notísia relevante: ME: Sei laiha ingresu automátiku ba profesór kontratadu 2023

Jornalista: Tomé Amado 

Editora: Maria Auxiliadora

iklan
iklan

Leave a Reply

iklan
error: Content is protected !!