Pedro Klamar Fuik husu veteranu kontinua kontribui ba libertasaun povu
BAUCAU, 27 novembru 2023 (TATOLI) – Governu liuhosi Ministru Defeza husu ba veteranu kontinua iha komitmentu atu kontribui luta ba libertasaun povu durante prosesu konstrusaun estadu Timor-Leste.
Ministru Defeza, Donaciono do Rosário Gomes “Pedro Klamar Fuik”, esplika, mesmu iha ona kondekorasaun ne’ebé estadu Timor-Leste rekoñese liuhosi medalla kondekorasaun presiza kontinua luta ba prosesu libertasaun ba povu liuliu prezerva independénsia ne’ebé konkista durante tinan-24 liuhosi sakrifísiu hotu.
“Ita presiza hasee malu atu hametin unidade, atu ita hanoin katak prosesu dezenvolvimentu to’o iha ema hotu-hotu,” Ministru Defeza hateten iha Sentru Konvensaun Baucau (CCB, sigla portugés) Vila Antiga, segunda ne’e.
Timor-Leste nia independénsia too tinan-2023 halo ona tinan-48 nune’e presija kontinua konkista nafatin liuhosi kontribusaun libertasaun povu Timor-Leste hosi mukit no kiak.
Bainhira prezerva no konkista inportante mak presiza halo vijilánsia ba ukun nain-sira no responsabilidade atu lori nasaun ba oin liuliu tenke fó kredibilidade ba estadu Timor-Leste.
“Ita tenke prepara oan sira atu hasoru dezafiu saida de’it mak ita-nia estadu hasoru hanesan iha tinan-24 konstrusaun nasaun no sei hasoru nafatin,” Pedro Klamar Fuik akresenta.
Veteranu hotu iha konsiénsia no hatudu ona iha luta libertasaun nasaun, maibé libertasaun povu presiza atu envolve ema hotu liuliu jerasaun tilmoroan tomak tenke iha konsiensia aas ba prosesu luta ba independénsia.
Governante ne’e, hateten, liuhosi selebrasaun loron nasionál proklamasaun independénsia ba tinan-48 sai reflesaun ba memoria istória luta nune’e futuru kontinua prezerva hodi kontribui ba prosesu konstrusaun estadu.
Prezensa Ministru Defeza, Donaciano Costa Gomes “Pedro Klamar Fuik ” iha munisípiu Baucau nu’udar reprezenta governu hodi kondekora veteranu kombatente libertartasaun nasionál hamutuk na’in-188 ho orden Nicolau Lobato.
Jornalista : Natalino Belo
Editór : Evaristo Soares Martins
