DILI, 27 novembru 2023 (TATOLI)—Prezidente Komisaun F trata asuntu Saúde iha Parlamentu Nasionál (PN), Deputada Maria Barreto, husu Ministériu Saúde (MS) atu halo prevensaun ba vírus foun pneumonia mistériu ne’ebé daudaun ne’e mosu iha Xina atu labele tama mai Timor-Leste.
Nia hateten, asuntu kona-ba saúde mundiál liuliu situasaun ne’ebé agora daudaun akontese iha nasaun Xina, mosu tan fali ona vírus foun ida naran pneumonia mistériu ne’ebé mak vírus ida-ne’e akontese hanesan ho faze primeiru iha pandemia COVID-19 ninian.
Moras ida-ne’e halai liu ba iha respiratóriu, entaun iha rai Xina ne’eba akontese barak liu ba labarik sira-ne’ebé mak afeta tebes ba sira-nia kondisaun respiratóriu no ospitál sira-ne’ebé mak iha Xina kuaze nakonu ona ho pasiente.
“Entaun, ha’u-nia preokupasaun ita haree ba situasaun atuál ne’ebé mak akontese katak iha mós vizitór sira hosi rai Xina ne’eba mai Timor-Leste no mós timoroan sira tama sai ba rai-li’ur no mós fila-fali mai Timor, Ita presiza kuidadu situasaun ne’e atu labele afeta hosi ema to’o mai Timor,” Nia levanta liuhosi reuniaun plenária PN, segunda ne’e.
Entaun husu ba MS tau atensaun ba vírus foun ne’ebé mak mosu labele afeta to’o Timor, liUliu rekomenda ba Governu oinsá halo screening ne’ebé hala’o iha aeroportu no fronteira terrestre atu nune’e antisipa ona labele fó afeta mai ita.
Kona-ba pneumonia mistériu iha Xina
Kona-ba virus foun pneumonia mistériu iha Xina, tuir Al Jazeera hateten;
- Komisaun Saúde Nasionál Xina relata moras pneumonia mistériu ka moras respiratóriu ne’e sa’e makaas liuhosi konferénsia imprensa ne’ebé realiza iha 13 novembru 2023.
- Iha domingu (19 novembru 2023), grupu pneumonia ne’ebé hetan liuhosi diagnostika ba labarik sira iha Xina Norte bazeia ba relatóriu hosi Program for Monitoring Emerging Diseases (ProMED), sistema vijilánsia ne’ebé halo relatóriu global kona-ba moras hada’et ne’e.
- Tuir relatóriu hosi Program for Monitoring Emerging Diseases (ProMED), infesaun ne’e barak loos iha Baijing no sidade Liaoning ho distánsia kilométru 800.
- Iha kuarta (22 novembru 2023), WHO husu Xina atu hato’o informasaun kona-ba moras pneumonia mistériu ne’e, inklui informasaun epidemiolojia no rezulatdu laboratóriu hosi grupu labarik sira.
- Maske númeru formal kona-ba totál kazu ne’e seidauk iha, maibé ospitál sira iha Beijing simu pasiente barak loos iha sala baixa labarik sira-nian. Ospitál boot ida iha Beijing relata katak kuaze loro-loron, sira simu pasiente maizumenus 1.200 tama iha fatin emerjénsia, ne’e tuir reportajen korespondente Al Jazeera, Katrina Yu, hato’o reportajen hosi Beijing iha kinta (23 novembru /2023).
- Eskola sira iha Beijing mós relata katak labarik barak mak la tama eskola ne’e nia númeru aas tebes, eskola fó feriadu ba labarik sira no husu ba inan-aman sira tenke kuidadu labarik sira.
Jornalista : Nelson de Sousa
Editór : Cancio Ximenes
