Subsídiu ba veteranu Baucau sei iha faze verifikasaun
BAUCAU, 27 novembru 2023 (TATOLI) – Prosesu subsídiu ba veteranu iha munisípiu Baucau sei iha faze verifikasaun no tuir grau tinan kontribusaun ba luta libertasaun nasionál.
Prezidente Konsellu Munisipál Kombantente Libertasaun Nasionál (CMCLN, sigla portugés), Fernando Gusmão “Berdu’u”, esplika, prosesu verifikasaun iha faze finalizasaun maibé subsídiu tenke tuir durasaun tinan ba kontribusaun luta independénsia, tantu iha ai-laran no vila laran.
“Durante verifikasaun, ha’u mak verifikadór, ha’u tenke husu tuir, la’ós fó naran naran deit,” Prezidente CMCLN Baucau hateten iha Sentru Konvensaun Baucau (CCB, sigla portugés) Vila Antiga, segunda ne’e.
Berdu’u hateten, kritéria importante mak bainhira baze apoia rahun hamutuk tinan-tolu no kombatente sira balun kastigu no balun tun rende iha vila laran sei konta hamutuk tuir kategória hanesan 4-7, 8-14 no 15-19.
Eis Komandante ne’e, husu atu kada veteranu sira tenke onestu ba prosesu verifikasaun liuliu durasaun tinan ba kontribusaun luta independénsia durante iha ai-laran no vila laran.
CMCLN Baucau rasik antes ne’e halo reverifikasaun ba dadus veteranu ne’ebé rezista dezde tinan-2009 liuhosi kada postu administrativu neen iha munisípiu Baucau ho totál kombatente rihun 10 resin, hosi totál dadus nasionál 124.680.
Jornalista : Natalino Belo
Editór : Evaristo Soares Martins
