BAUCAU, 27 novembru 2023 (TATOLI) – Veteranu hamutuk nain-188 simu medalla kondekorasaun orden Nicolau Lobato iha loron Proklamasaun Unilaterál Independénsia ba dala-48 iha munisípiu Baucau.
Desizaun kondekorasaun refere bazea ba dekretu Prezidensiál numéru 103/2023 kona-ba nomeasaun membru Konsellu Munisipál Kombantente Libertasaun Nasionál (CMCLN, sigla portugés) reprezenta Prezidente Republika atu kondekora veteranu iha ámbitu loron Proklamasaun Unilaterál Independénsia.
Dekretu Prezidensiál numéru 104 kona-ba kondekorasaun variedade ordem iha ambitu selebarasaun loron-28 novembru, aniversáriu loron proklamasaun independénsia ba dala-48.
Ministru Defeza, Donaciano do Rosário Gomes “Pedro Klamar Fuik”, lori governu konstitusionál lideradu Primeiru ministru Xanana Gusmão, agradese no sente urgullu hodi reprezenta estadu Timor-Leste kondekora veteranu kombatente libertartasaun nasionál iha munisípiu Baucau.
“Iha fatin ne’e ha’u bele sai testemuña ba prosesu kondekorasaun jerasaun eroika ne’ebé fó nia vida no aan tomak ba luta libertasaun nasionál,” Ministru Defeza hateten iha Sentru Konvensaun Baucau (CCB, sigla portugés), segunda ne’e.
IX governu hato’o kongratulasaun ba veteranu hirak refere ne’ebé fo aan kontribui ba luta libertasaun nasionál too hetan ukun rasik aan liuhosi lideransa hosi tinan-1975 tanba hakarak hetan soberania nu’udar nasaun no liberdade ba povu.
Costantino Coreia dos Santos ‘Lai’ nu’udar oan hosi Veteranu Domingos dos Santos ‘Lalu’ ho matan-been senti triste tanba reprezenta aman simu kondekorasaun orden Nicolau Lobato grau III tanba Lalu hakotu ona iis iha tinan-2022.
“Ha’u laran triste lolos nee pai mak simu maibe realidade hau mak reprezenta maibé ha’u louva ho pai nia sakrifísiu,” Costantino dos Santos hateten.
Maske nune’e, Costantino dos Santos hato’o agradesementu ba estadu Timor-Leste tanba rekoñese ona Lalu liuhosi medalla kondekorasaun orden Nicolau Lobato.
Hosi veteranu nain-188 refere estudu Timor-Leste kondekora ho orden Nicolau Lobato tuir kategória kompostu grau 3 kontribui luta durante tinan-20-23 na’in-ida no kontribusaun hosi tinan-15-19 hamutuk na’in-13, grau 2 kontribui hosi tinan-8 too 15 hamutuk na’in-tolu no kontribuisaun luta hosi tinan-8 to’o 14 hamutuk nain-171.
Jornalista : Natalino Belo
Editór : Evaristo Soares Martins
