BAUCAU, 28 novembru 2023 (TATOLI) – Governu konsidera xefi suku mak nu’udar lideransa lokál ne’ebé promove prinsípiu no fo valór ba demokrasia iha nasaun Timor-Leste.
Ministru Defeza, Donaciano do Rosário Gomes “Pedro Klamar Fuik”, esplika, liuhosi juramentu ne’ebé halo iha serimonia toma pose xefe suku sira nu’udar parte hosi kompromisu atu hatuur hikas prinsípiu ne’ebé sai hanesan rin ba rezime demokrátiku ho objetivu estratéjiku ne’ebé hatuur ona hosi governu hodi promove dezenvolvimentu nasionál.
“Lideransa lokál mak kaer kna’ar inportante tebes atu haforsa valór demokrátiku, sira mak hala’oo funsaun hanesan intermediáriu ne’ebé esensiál entre komunidade sira hakarak atu hetan no institusaun sira iha governu atu hala’o,” Ministru Defeza hateten iha resintu Administrasaun Munisipál Baucau Vila Nova, tersa ne’e.
Governu sei la tau sees líder komunitária sira hosi nasaun tanba konsidera kna’ar xefi suku esensiál hanesan harii sosiedade justu, inkluzivu no prósperu liuhosi kompromisu lulik atu serbí ho hatudu dalan ba komunidade lokál.
Governu rekoñese kna’ar xefe suku hodi konkretiza objetivu ne’ebé estratéjiku relasiona ho dezenvolvimentu nasionál tuir Planu Estratéjiku Dezenvolvimentu Nasionál (PEDN) nune’e tenke iha neon tuir nesesidade komunidade sira iha baze.
Bainhira lideransa komunitariu fasilita diálogu, hato’o nesesidade no promove partisipasaun komunidade sívika iha ámbitu suku mak xefe suku haforsa ona aliserse hodi harii demokrasia.
“Responsablidade ne’ebé simu la’ós kmaan maibé bele harii futuru ida kmanek iha rai doben,” Pedro Klamar Fuik akresenta.
Xefi suku Samalari, Rui Sertório Magno Sequeira, hateten, asume kargu nu’udar xefe suku presiza hala’o ho responsabilidade no akuntabilidade nune’e hahú ohin prontu atu serbí ba povu iha kada suku no munisípiu Baucau tomak.
“Kna’ar ne’ebé ohin ami simu laoos fasil maibé todan, demokrasia hatudu mai ohin simu todan ne’e tanba povu mak deside,” Rui Sequeira hateten.
Lideransa komunitária iha Baucau hamutuk nain-59 kompostu feto na’in-haat no mane na’in-55 ne’ebé eleitu nu’udar xefe suku hafoin kompete iha eleisaun komunitária hosi tótal kandidatura hamutuk 243 kompostu feto na’in-26 no mane na’in-217 ho totál votante rihun 99-resin.
Jornalista : Natalino Belo
Editór : Evaristo Soares Martins
