BOBONARO, 28 novembru 2023 (TATOLI)-Hafoin prezide serimonia hasa’e Bandeira Nasionál iha komemorasaun loron Proklamasaun Unilaterál Independénsia 28 novembru ba dala-48, Ministra Edukasaun, Dulce de Jesús Soares, husu xefe suku sira atu servisu hamutuk ho povu.
Ministra Dulce, apela ba xefe suku eleitu iha postu administrativu Maliana, atu kontinua serbí povu ho di’ak, tánba hosi totál suku hitu ne’e úniku suku Saburai mak foun, restante taun ne’ebé maioria iha esperiénsia ba ukun.
Notísia relevante: Feto potensiál 18 eleita sai xefe suku
“Sira hotu importante atu mentein seguransa, unidade no servisu hamutuk di’ak tebes iha povu nia leet, tanba mesmu ita enfrenta dezafiu oioin,maibé oportunidade mos oinoin ba ita, depende ba ita-nia líder komunitária sira, ha’u hanoin katak sira iha postu Maliana, xefe foun ida de’it, signifika katak povu fó nafatin fiar ba sira hodi lidera rai ida-ne’e,” nia informa ba jornalista sira iha kampu futeból Maliana, tersa ne’e.
Governante ne’e reforsa, maski hosi suku hitu ne’e laiha xefe suku feto, maibé ne’e orgulu feto 50 resin sei eleitu ba membru konsellu suku, balu sai xefe aldeia delegada no reprezentante joven feto.
“Ne’e nafatin iha avansu boot ida tebes, mesmu ke hare entermu xefe suku nasionál númeru tun oituan, maibé ne’e la’ós indikadór ida atu dehan feto la partisipa iha dezenvolvimentu, feto nafatin partisipa dezenvolvimentu iha nível oinoin, hau nafatin konvida feto maluk sira, atu kontinua servisu maka’as hamutuk mane sira hodi lori dezenvolvimentu ba oin,” Dulce apela.
Xefe suku re-eleitu Holsa, António Santa Cruz, agradese ba povu sira-ne’ebé nafatin depozita konfiansa ba nia maioria absoluta iha primeira ronde ho votu 1,880 atu kontinua lidera suku ne’e ba períodu ida tán.
“Ha’u hetan konfiansa ne’ebé maka’as tebes hosi ha’u-nia komunidade, ne’e duni ba oin ha’u-nia planu hakarak servisu hamutuk ho komunidade suku ida-ne’e no halo planu hamutuk atu lori dezenvolvimentu mai iha suku ida-ne’e,” nia promete.
Iha biban ne’e, Ministra Edukasaun distribuí fotografía Xefe Estadu, Primeiru Ministru, Ministru Administrasaun Estatál no Vise Ministru Administrasaun Estatál ba suku hitu ne’e atu monta iha sede suku.
Tuir observasaun Agência Tatoli iha terrenu notak katak, komunidade Maliana entuziasmu partisipa iha atividade oioin hansan; sae-bua, tebe-tebe, jogu bola guling, futu manu no seluk tán.
Notísia Relevante:Partisipasaun eleisaun suku volta daruak iha aldeia Ritabou menus
Jornalista: Sérgio da Cruz
Editór: Evaristo Soares Martins
