VIQUEQUE, 28 novembru 2023 (TATOLI)—Ministru Agrikultura, Pekuária, Peska no Floresta, Marcos da Cruz, husu ba povu serbisu ho Governu dezenvolve rai.
“Ho komemorasaun ida-ne’e ha’u hakarak husu ba ema hotu-hotu liu agrikultór no emprezáriu timor-oan sira atu serbisu hamutuk ami hodi dezenvolve ita-nia natar, to’os, hakiak animál atu ita bele hasa’e produsaun no proteje natureza ambiente no floresta sira,” Ministru Marcos informa ba Agência Tatoli, iha resintu administrasaun Viqueque, hafoin ramata isar bandeira, tersa ne’e.
Biban ne’e, Ministru husu Viqueque-oan sira atu mantein pás no estabilidade hodi dezenvolve Timor-Leste nune’e bele hetan futuru ne’ebé prósperu.
“Orgullu ba ita-nia Estadu tanba ita-nia ukun-an. Ho sakrifísiu barak maka ita hetan hosi tinan 1999, agora ita nu’udar Estadu demokrátiku ne’ebé halo ona tinan-20 resin, nune’e ha’u husu ba timor-oan hotu inklui Viqueque-oan sira atu mantein estabilidade no pás hodi ita bele dezenvolve ita-nia rai atu hetan futuru próperu, futuru di’ak ba ema hotu tanba ida-ne’e maka mehi no objetivu hosi funu na’in sira, hakarak ita ukun-an,” nia tenik.
Notísia relevante : TOMAK Prioritiza Hadi’ak Seguransa Ai-han no Dezenvolve Agrikultura Komersiál
Iha loron 28 novembru tinan 1975 , funu na’in sira deklara katak Timor-Leste independente tanba hakarak povu moris di’ak, maibé tinan 2023 ba dala 48 seidauk atinje mehi.
“Ita-nia povu sei presiza buat barak inklui ai-han ne’ebé sei lori hosi rai-liur maka barak. Tanba ne’e, husu ba povu hotu no emprezáriu timor-oan sira atu serbisu hamutuk ho Governu, liu-liu Ministériu Agrikultura hodi dezenvolve rai, liu-liu natar, to’os no hakiak animál hodi hasa’e produsaun rai-laran,” Marcos akresenta.
Aleinde ne’e, nia husu ba povu hodi kontribui halo konservasaun ba bee-matan sira-ne’ebé maka eziste nune’e bele hamoris bee ba ema tanba bee maka fó moris.
“Tanba ne’e, ema hotu ajuda hodi konserva no proteje ba bee-matan sira ne’ebé maka iha atu nune’e bele prodús nafatin bee ba ita hodi bele sustenta nesesidade loron-loron,” nia subliña.
Ministru enkoraja joven timor-oan sira hodi hamutuk kria unidade hodi dezenvolve setór hotu-hotu, liu-liu setór agrikultura no setór ekonómiku.
“Ámbitu komemorasaun dala-48 ne’e ha’u husu joven timor-oan sira hamutuk kria unidade, pás no estabilidade hodi ita dezenvolve ita-nia rai liuhosi setór agrikultura no ekonómiku,” nia hameno.
Jornalista : Vitorino Lopes da Costa
Editora : Julia Chatarina
