Selebra loron Proklamasaun Independénsia, Governu husu entidade hotu hamutuk lori dezenvolvimentu ba Baucau
BAUCAU, 28 novembru 2023 (TATOLI) – Liuhosi selebarasaun loron proklamasaun independénsia ba dala-48, Governu sentrál husu entidade hotu hamutuk lori dezenvolvimentu ba munisípiu Baucau.
Ministru Defeza, Donaciano do Rosário Gomes “Pedro Klamar Fuik”, esplika, prezensa iha munisípiu Baucau nu’udar reprezentante governu sentrál atu hamutuk komunidade, autoridade munisipál, sivíl no militár realsiona ho loron proklamasaun independénsia ba dala-48 ne’ebé nakonu ho entuziasmu no dignidade.
“Husu povu hotu hamutuk atu lori dezenvolvementu ba Timor-Leste, prosperidade sei bele akontese ho dezenvolvimentu,” Ministru Defeza hateten iha resintu Administrasaun Munisipál Baucau Vila Nova, Tersa ne’e.
Maske Timor-Leste hasoru dezafiu, maibé sidadaun hotu-hotu tenke nafatin iha optimismu katak fiar dezenvolvimentu sei lori moris di’ak ba ema hotu-hotu iha futuru.
Governante ne’e, konsidera IX governu foin eziste seidauk to’o tinan maibe program ne’ebé iha hetan aprovasaun hosi Parlamentu Nasionál liuliu liuhosi autoridade lokál sira sei hato’o mesazen no halo dezenvolvimentu dereita ba povu iha baze.
“Ha’u fiar ida-ne’e sai prioridade dahuluk ba governu tanba bele habelar dezenvolvimentu to’o iha ema hotu-hotu,” Pedro Klamar Fuik akresenta.
Diretór Serbisu Munisipál Edukasaun Baucau, Augosto Ornai Ximenes, hateten, proklamasaun independénsia nu’udar loron importante ba Timor-Leste atu selebra nune’e ho tinan-48 ne’e bele lori dezenvolvimentu nasaun iha futuru liuliu setór edukasaun.
“PresiZa investe liuliu alokasaun orsamentu hodi hasa’e kualidade nune’e futuru iha jerasaun kontinuadór hodi kontribui ba dezenvolvimentu,” Augosto Ximenes hateten.
Serimónia komemorasaun loron proklamasaun independénsia 28 novembru ba dala-48 hahú ho hasa’e bandeira no kontinua ho toma pose ba xefi suku iha postu administrativu Baucau vila ne’ebé partisipa hosi Ministru Defeza Donaciano do Rosário Gomes, Prezidenti Autoridade Munisipál Baucau Olivio Freitas, Veteranu Baucau, Diretór Serbisu Munisipál, estudante no komunidade Baucau.
Jornalista : Natalino Belo
Editór : Evaristo Soares Martins
