DILI, 28 novembru 2023 (TATOLI) – Rikusoin boot liu nasaun nian mak ema no la’ós minarai no gás, tanba ne’e eis-Ministru Interiór, Rogério Tiago Lobato, husu ba Governu atu investe barak liu iha setór edukasaun hodi garante kualidade rekursu umanu ba dezenvolvimentu país.
“Ha’u sempre dehan rikusoin boot liu iha Timór ne’e la’ós minarai no gás naturál, maibé ema ne’ebé matenek”, Rogério Lobato hatete iha marjen komemorasaun Loron Proklamasaun Independénsia ba dala-48 iha Palásiu Prezidensiál Nicolau Lobato, Bairru Pité, ohin.
Nia dehan edukasaun Timor-Leste atu lao di’ak importante liu maka tenke hetan atensaun maka’as husi Estadu, nune’e bele hadi’a ninia kualidade hodi bele garante dezenvolvimentu ba rekursu umanu iha país.
Entretantu ba Rogério Lobato, Timor-Leste seidauk investe barak iha setór edukativu ne’e maka to’o ohin loron ba produsaun mina no gás naturál rasik mós sei presiza ema hosi rai-li’ur maka mai halo perfurasaun ba mina-matan sira.
“Ha’u husu ba IX Governu katak tempu to’o ona atu iha mandatu tinan lima ne’e tenke investe maka’as iha área edukasaun. Ita-nian ema tenke matenek, tenke domina siénsia ho ida ne’e de’it maka ita rain bele la’o ba oin”, afirma.
Ba nia, bainhira Ezekutivu troka malu maibé la hanoin atu investe ba setór edukasaun bele ba to’o iha ne’ebé de’it nasaun sei difísil atu hakat bá oin.
Nia hato’o mós esperiénsia iha nasaun alemaña katak rai ida avansadu tebes iha Europa, sira-nian funsionáriu ne’ebé manán saláriu di’ak liu maka profesór sira, tanba Estadu rekoñese sira-nian dedikasaun katak sira de’it maka forma ema sai ema atu iha futuru bele dezenvolve país.
Nune’e nia solisita atu Timor-Leste mós tenke halo esforsu no Governu ninia responsabilidade maka buka atu kria polítika ida di’ak hodi tau planu ida feitu iha programa prioridade ba edukasaun, nune’e bele hahú aselera ona prosesu sira atu hadi’a edukasaun iha mandatu ne’ebé iha. Maibé nia dehan ba tinan lima ne’e IX Governu hakarak muda buat hotu ne’e la fásil, tenke iha planu ida di’ak hodi prepara ba médiu no longu prazu nian.
“Ha’u husu ona ba Governu tenke prepara komesa agora liuhusi mudansa ba mentalidade atu iha vontade hodi halo serbisu no kontinua investe iha edukasaun hodi halo timoroan sai matenek barak iha área oioin atu hadi’a rai ida ne’e”, realsa.
Notísia relevante: Horta destaka prioridade edukasaun no saúde ne’ebé kualidade ba labarik
Jornalista: Tomé Amado
Editora: Maria Auxiliadora
