DILI, 28 novembru 2023 (TATOLI) – Prezidente Repúblika José Ramos Horta, kondekora Prezidente Repúblika Guiné-Bissau, Umaro Sissoco Embaló ho “Ordem colar de Timor-Leste”, grau medalla onra, iha ámbitu Proklamasaun Independénsia Timor-Leste, 28 Novembru, iha Palásiu Prezidensiál Bairru-Pité, Dili, ohin.
Kondekorasaun ida ne’e nu’udar rekoñesimentu hodi promove amizade entre povu rua – Guiné-Bissau no Timor-Leste, reafirmasaun pás no fortalesimentu estabilidade nasionál.
“Ha’u hakarak hato’o ha’u-nia gratidaun ba prezensa ilustre husi Umaro Embaló, Prezidente Guiné-Bissau, hanesan konvidadu onra iha selebrasaun Timor-Leste nian,” Xefe Estadu timoroan, José Ramos Horta hateten, iha nia diskursu.
Prezensa xefe Estadu Guinénse ne’e hanesan onra ida ba povu Timor-Leste. Prezidente hanesan belun, maibé mós hanesan reprezentante fraternál husi maun-alin no inan-feton sira Guiné-Bissau nian.
“Ha’u aproveita oportunidade atu estende votu no felisitasaun ne’ebé sinseru ba povu nobre Guiné Bissau ba komemorasaun ba 50º Aniversáriu Independénsia Nasional Guiné-Bissau nian, ne’ebé selebra iha loron 24 Setembru 2023,” Horta kongratula.
“Ha’u hanoin ho respeitu ba proklamasaun unilaterál ba feitu istóriku ida ne’e no aprovasaun ba Konstituisaun Repúblika nian ne’ebé primeiru nia desizaun deliberada husi Asembleia Nasionál Populár, ne’ebé halibur iha Matas de Madina de Boé,” nia salienta.
Prezidente repúblika, José Ramos Horta hatutan, komemorasaun sira ne’e la’ós de’it omenajen ba Aman Fundadór Nasional Guiné-Bissau nian, inklui Líder Saudozu ba Luta Armada, Amílcar Cabral, maibé mós destaka prosesu libertadór ne’ebé inspira Proklamasaun Independénsia Nasionál Timor-Leste nian iha loron 28 Novembru 1975.
“Ha’u labele la mensiona ho gratidaun misaun nobre ha’u nian hanesan Reprezentante Espesiál husi Sekretáriu-Jerál Nasoens Unidas nian iha Misáun UNIOGBIS. Ha’u rai ho apresiasaun boot iha ha’u-nia laran memória sira ne’ebé di’ak husi povu Timor-Leste nian, espesialmente perkursu ne’ebé ha’u halo iha rai-laran tomak iha tempu fulan 18 iha misaun ha’u nian,” Horta haktuir.
Nune’e, líder nasionál timoroan ne’e, hakarak aborda pontu tolu ne’ebé esensiál iha konjuntura internasionál, ne’ebé sai hanesan dezafiu verídiku ba komunidade internasionál, espesialmente ba sira ne’ebé partilla nia ideál sira ba liberdade, independénsia, Estadu Direitu, Demokrasia no soberania, ne’ebé selebra iha momentu ne’e.
Jornalista: Hortencio Sanchez
Editór: Rafael Ximenes de A. Belo
