iklan

NASIONÁL, DILI, ELEISAUN, HEADLINE, INKLUZAUN SOSIÁL

Xefe suku foun 26 iha Dili simu ona posse

Xefe suku foun 26 iha Dili simu ona posse

Imajen/: Jesuína Xavier

DILI, 28 novembru 2023 (TATOLI) – Xefe suku foun hamutuk 26 husi postu Administrativu lima, munisipiu Dili, tersa ne’e, simu ona posse ba mandate períodu tinan hitu, hahú 2023 to’o 2030.

Iha ambitu tomada pose ne’e, Ministra Saúde Elia Amarál husu ba xefe suku foun sira atu serbí komunidade ho loos no ho fuan hodi garante pás no estabilidade.

“Ohin imi simu posse, tenki hatudu  kompromisiu no estratéjia atu hatur prinsípiu ida legál atu sai ai-rin ba rejime demokrátiku hodi promove dezenvolvimentu nasionál”, Governante ne’e hatete liuhosi diskursu iha Caicoli-Dili.

Minsitra ne’e mós husu ba Xefes uku ho nia membru Konsellu Suku sira  tenke hala’o kna’ar esensiál ida ne’ebe justu, inkluzivu no prósperu.

“Lider komunitaria tenke sai fini ba diálogu iha suku no partisipa ativamente ba iha edukasaun sívika iha suku hodi bele kontribui ba iha dezenvolvimentu nasionál,” nia afirma.

Iha fatin hanesan, Prezidente Autoridade Munisípiu Dili (AMD), Guilhermina Fonseca Saldanha, apela ba  xefe suku sira atu koñese nia membru komunidade sira iha baze.

“Ita presiza hatene dadus no koñeese kominudade bele ajuda Governu ho dadus atubele fó apoio ka levanta dadus husi autoridade lokál sira,” katak nia.

Garante pás no estabilidade

Entretantu, Xefe suku foun Bairu Pité, Joaninha Alves, ne’ebé reprezenta xefe suku 26 iha munisipiu  Dili afirma katak sei hala’ao kna’ar nu’udar lideransa lokál atu serbí komunidade sira ho fuan,.

“Hanesan feto hamutuk ha’u nia feto maluk Xefe suku Kampung Alór no Gricefor lidera iha suku hamutuk ho mane maluk, signifika feto bele”, nia fiar.

Tanba ne’e, nia husu ba xefe suku mane sira atu apoia xefe suku feto sira nia lideransa hodi bele kontribui ba iha dezenvolvimentu nasionál

Entretantu, Xefe Suku Kamea, Matos da Costa, hateten komunidade fó nafatin konfiansa iha mandatu tinan hitu mai. “Ba oin ami sei esforsu rezolve problema sosiál sira iha suku liuliu bee moos ba komunidade”, katak Xefe Suku Kamea ne’e

Xefe suku afira iha prioridade rua mak hanesan bee moos, estrada no eskola balun ne’ebé  hetan inundasaun.

Nia garante iha esperansa atu rezolve fazeadamente problema sira ne’ebé komunidade enfrenta durante tinan hitu.

Jornalista: Jesuína Xavier

Editór   : Florencio Miranda Ximene

iklan
iklan

Leave a Reply

iklan
error: Content is protected !!