COVALIMA, 29 novembru 2023 (TATOLI) – Asisténsia Legál ba Feto no Labarik (ALFeLa) fó formasaun sobre enkuadramentu legál violénsia kontra feto no labarik ba Asosiasaun Espoza Polísia Nasionál Timor-Leste (AES-PNTL) iha Covalima.
Koordenadór Prevensaun no Advokasia ALFeLa, Antoninho Marques, hateten formasaun ne’e parte ida atu hasa’e koñesimentu AES-PNTL sira-nian ba violénsia kontra feto no labarik atubele prevene krime ne’ebé akontese iha família.
Antoninho Marques dehan ba redusaun kazu violénsia kontra feto no labarik ne’e presiza entidade hotu nian serbisu hamutuk.
Koordenadora AES-PNTL Covalima, Dulcia Fernandes Barreto, reforsa katak formasaun ne’e relevante no asosiasaun bele aplika iha ida-idak nia família no bele tranzmite informasaun ba komunidade sira.
Nia dehan violénsia kontra feto no labarik sempre hasoru iha família tanba falta asesu informasaun no lahatene katak violénsia ne’e krime no bele hetan pena.
Tuir dadus, entre 2022 no 2023, ALFeLa rejista kazu violénsia hamutuk rihun 6-resin. Tipu kazu sira ne’e mak violénsia doméstika, seksuál, abuzu seksuál no krime sira seluk ne’ebé afeta ba feto no labarik sira.
Husi totál kazu ne’ebé rejista, rihun 2-resin hetan ona desizaun husi tribunál, seluk sei iha polísia, Ministériu Públiku nomós iha justisa.
Violénsia doméstika akontese aas iha Dili, Baucau, Covalima no Rejiaun Administrativa Espesiál Oé-Cusse Ambeno.
Jornalista: Celestina Teles
Editora: Maria Auxiliadora
