DILI, 29 novembru 2023 (TATOLI) – Primeiru-Ministru (PM), Kay Rala Xanana Gusmão, bolu ona atensaun ba manorin sira ne’ebé envolve iha Grupu Arte Marsiál (GAM), tanba konsidera sei halakon valór edukasaun, relijiaun no kulturál.
Xefe Governu ne’e dehan daudaun problema boot liu ne’ebé akontese iha país maka envolvimentu timoroan sira-nian iha GAM, tanba ho atividade sira ne’e maka dalabarak halakon tiha valór morál sira ne’ebé timoroan sira aprende liuhusi edukasaun, liuhusi relijiaun nomós husi kultura.
“Favór ida, ha’u lakohi haree profesór sira-ninia envolvimentu iha atividade iha grupu sira ne’e. Kuandu ha’u rona sala envolvimentu profesór sira-nian iha grupu, ha’u sei la halimar atu foti medida hasoru sira ne’e”, Xanana aviza iha salaun enkontru Ministériu Edukasaun Vila Verde, ohin.
Ba Xefe Ezekutivu, profesór sira-nian misaun mak atu eduka ema sai ema no eduka ema atu hatene tane aas valór sira edukasaun nian, relijiaun no kulturál ne’ebé mai husi ema nia aan rasik. Tanba ne’e, manorin sira tenke haketak aan husi atividade sira ne’ebé inklina ba asaun krimi atu labele lori risku ba ninia vida.
“Favór fó hatene ba malu katak ha’u la admite liu atividade sira ne’e atu buras iha profesór ida-idak ninia moris, tanba ha’u rona ona katak iha profesór lubuk ida maka agora implementa ona sistema arte marsiál iha eskola sira”, apela.
Nia salienta, iha informasaun katak, profesór balun komesa implementa ona maneira ne’e ba estudante foun sira ne’ebé atu halo rejistu foun tenke kór ka envolve arte marisiál hanesan ho sira. Kuandu alunu kór seluk, profesór sira sei la admite tama iha eskola ne’e no bele buka fali fatin seluk.
Tanba ne’e maka agora Governu buka atu halo identifikasaun karik loos no hetan hahalok hanesan ne’e iha eskola sira maka sei iha desizaun rigoroza hasoru sira. “Husu ba profesór sira ne’e di’ak liu para tiha hahalok sira ne’e, maibé prepara aan halo didi’ak atu loroloron bá eskola hodi hanorin labarik sira iha aula laran”, realsa.
Jornalista: Tomé Amado
Editora: Maria Auxiliadora
