iklan

BAUCAU, HEADLINE, MUNISÍPIU, SOSIEDADE SIVĺL

Aniversáriu Dioseze Baucau ba dala-27, Dom Leandro husu sarani hotu la’o hamutuk

Aniversáriu Dioseze Baucau ba dala-27, Dom Leandro husu sarani hotu la’o hamutuk

Bispu Dioseze Baucau, Dom Leandro Maria Alves. Imajen Agência TATOLI/Natalino Belo.

BAUCAU, 30 novembru 2023 (TATOLI) – Bispu Dioseze Baucau konvida relijiozu, padre, madre no sarani sira hamutuk halo reflesaun liuliu la’o hamutuk iha loron aniversáriu ezisténsia Dioseze Baucau ba dala-27.

Bispu Dioseze Baucau, Dom Leandro Maria Alves, esplika, ohin loron Igreja Katólika selebra loron santo Andre ne’ebé Jesus Kristu bolu hamutuk sai nu’udar nia eskolante ba dahuluk hodi haklaken Maromak nia-liafuan nune’e ho selebarasaun ezisténsia aniversáriu Dioseze Baucau nian ba dala-27 konvida komunidade relijiozu hotu atu hamutuk iha mahon ida hodi kontinua haklaken misaun Maromak nian iha Dioseze Baucau.

“Ita la’o hamutuk atu haree oinsá mak fó kontribusaun ho domin ba ita-nia la’o hamutuk ida-ne’e nu’udar igreja lokál hodi harii Maromak nia reinu iha dioseze ida-ne’e,” Bispu Dioseze Baucau hateten iha Igreja Katedrál, Vila Antiga, Baucau, kinta ne’e.

Bispu Dioseze Baucau, Dom Leandro Maria Alves, foto hamutuk ho padre pároku sira hafoin misa selebrasaun aniversáriu Dioseze Baucau iha Katedrál, Vila Antiga, kinta (30/11). Imajen Agência TATOLI/Natalino Belo.

Dom Leandro Alves, hateten, liuhosi selebarasaun loron inportante ne’e sai momentu reflesaun ba sarani hotu katak Maromak bolu atu hateke ba aan nu’udar individu tuir responsabilidade hanesan Nain-lulik, relijiozu no sarani ne’ebé hamutuk forma Igreja ida-ne’e, maske kna’ar no responsabilidade mak la’o ketak-ketak, maibé la’o hamutuk iha uma ida-de’it ne’ebé hanaran Dioseze Baucau.

Reflesaun ne’e tuir evanjellu katak Jesus bolu nia eskolante Andre, Simão, Tiago no João moris hamutuk atu hala’o misaun ne’ebé la’ós responsabilidade individual, maibé jerál katak la’o hamutuk iha misaun sai hanesan maun-alin, fraternidade iha Igreja.

Dom Leandro Alves, hateten, Igreja Katólika harii liuhosi espíritu komunitária ne’ebé importante ba ema idak-idak nia aan, katak iha Igreja laiha individualismu maibé iha mak espíritu komuñaun ne’ebé konstrui liuiosi dalan komunidade.

“Mesmu kna’ar no responsabilidade idak-idak maibe ita hotu-hotu iha kakuluk ida-de’it mak Igreja Dioseze Baucau,” Dom Leandro Alves akresenta.

Selebarasaun loron aniversáriu Dioseze Baucau ba dala-27 partisipa hosi padre pároku, madre no sarani ne’ebé Dom Leandro Maria Alves mak nu’udar selebrante iha misa aniversáriu Dioseze Baucau.

Dioseze Baucau eziste iha loron-30 novembru tinan-1996 komposta sarani hosi munisípiu haat hanesan; Manatuto, Lautém, Viqueque no Baucau, ho tótal parókia 22 inklui rezidénsia 24.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!