Austria planeia estabelese Konsuladu iha Timor-Leste
DILI, 30 novembru 2023 (TATOLI)—Embaixadór Austria iha Indonézia, Thomas Loidl, hasoru malu ho Primeiru-Ministru (PM), Kay Rala Xanana Gusmão, hodi informa kompromisu hametin kooperasaun diplomátiku no posibilidade loke Konsuladu Austria iha Timor-Leste.
“Previlejiu ida hasoru Primeiru-Ministru, Timor-Leste no Austria hanesan nasaun kiik, Timor-Leste hanesan país kiik ida iha Sudeste Aziátiku, enkuandu Austria nasaun kiik ida iha kontinente Europa, hakarak partisipa no promove valór demokrasia no direitu umanu. Hasoru Primeiru-Ministru hodi informa katak ami hakarak loke ami-nia Konsuladu Austria iha Timor-Leste,” Embaixadór hateten hafoin enkontru ho PM Xanana, iha Palásiu Governu, kinta ne’e.
Notísia relevante : PN-TL partisipa konferénsia mundiál Áustria tanba iha vantajen
Diplomata ne’e dehan, bainhira konsege loke Konsuladu lmaka sei lori nasaun rua hodi hametin kooperasaun diplomátiku hodi habelar kooperasaun iha área saúde no dezenvolve infraestrutura bázika.
Austria nu’udar belun di’ak Timor-Leste, ne’ebé iha tempu rezisténsia fasilita no apoiu timor-oan sira iha Austria hodi luta ba independénsia.
IX Governu Konstisionál define Timor-Leste nia polítika esterna ho prinsípiu ida-ne’ebé konsagra sentidu independénsia no soberania mak: ‘Ba Timor-Leste, laiha aliadu ka inimigu, hotu-hotu sei hamutuk no amigu de’it. Ida-ne’e sai hanesan Timor lema, ne’ebé sei orienta iha relasaun esterna, iha konjuntura internasionál ida-ne’ebé daudaun ne’e defísil tebes.
Maski Timor-Leste sei joven ka sei frájil, maibé iha ona mehi boot ho esperansa no konfiansa katak bele mantein pás, moris sosiál, hadi’a justisa no konsolida instituisaun Estadu. Ida-ne’e hotu nu’udar pilár fundamentál atu atrai investimentu hodi dezenvolve setór ekonómiku no hadi’a kondisaun sosiál hosi dalan sustentável.
Jornalista : Antónia Gusmão
Editora : Julia Chatarina
